CEBU, Philippines - Usa ang patay ug usa angol dihang gipamusil ang pundok sa mga batan-on sa ilang kontra diha sa sitio Latid barangay Bato siyudad sa Toledo niadtong Lunes sa alas 11:53 sa gabii.
Ang biktima nga patay nang nadangat sa tambalanan mao si Deck Caballero Cabante, 19, ug naangol usab ang kauban niining si Jimber Gentapa, 18, pulos molupyo sa maong lugar.
Matud pa ni PO2 Enerio Roxam sa Toledo City Police dihang nahinabi sa Banat News ang mga biktima gikan nga nanuwa og basketball kauban sa mga barkada ug paingon nang mamauli dihang nakasugat og rambol ngadto sa laing pundok sa mga batan-on nga nisampot sa paglinabayay og bato.
Dangtan og pipila ka gutlo kalit lang mipaka ang buto-buto sa armas ug naigo si Caballero sa ilok sa tuong bahin ingon man sa ibabaw sa walang dughan samtang si Gentapa naigo sa walang paa ug pulos gihatud sa Toledo City District Hospital.
Apan gi-deklarar nga dead on arrival si Caballero samtang gibalhin sa Vicente Sotto Memorial Medical Center (VSMMC) si Gentapa. - BANAT NEWS