BOPK migamit og kawani City Hall?

CEBU, Philippines - Mopasaka og kaso si congressional-candidate sa South District Jonathan Guardo batok ni Mayor Tomas Osmeña sa paggamit sa mga empleyado sa city hall para sa umaabot nga eleksyon karong Mayo 10, 2010.

Pasakaan pud sa kampo nilang Guardo ang mga empleyado nga mipagamit sa mayor nga sila si Eddie Cabras, Jun Deogracias, Dennis Abarientos, Jerry Marquez ug Cathy Yso.

Sumala pang Guardo gihimo silang speakers sa mga pulong-pulong ug political organizers nga matud pang Guardo paglapas sa Election Laws.

Ang Comelec nagdili sa mga incumbent officials nga mikandidato karong piniliay paggamit sa mga resources sa gobiyerno alang sa ilang politikanhong kalihukan.

Matud pa sa kampo ni Guardo, dili lamang ang mga empleyado sa city hall ang maoy gigamit ni Osmeña kundili hasta pud ang paggamit niini sa pundo sa mga tawo sa dakbayan aron mapaabtik og balik ang iyang nagkahuyang nga kandidatora.

Giisip hinuon ni Guardo nga ang paggamit ni Osmeña sa mga kawani sa city hall timaan lang nga nagkahinay ang kandidatora niini sanglit wala nay moboluntaryong moabag sa iyang kandidatora.

Sa laing bahin, gisaway sa Kapitolyo ang pagpanghatag ni Cebu City Mayor Tomas Osmeña ug mga opisyales sa siyudad sa Sugbu og P4 mil sa mga senior citizen isip insentibo matag tuig.

Si Capitol Consultant on Information Atty. Rory Jon Sepulveda nagkanayon nga klaro kaayong pamolitika ang pagpanghatag sanglit hapit na man ang election.

Nasayran nga niadtong nakalabay lang tuig gisugdan sa mayor ang pagpanghatag sa maong benepisyo isip birthday gift ug Christmas Gifts sa mga edaran sa siyudad.

Apan giklaro ni Sepulveda nga makatingala nganong sa dili muminus sa usa ka bulan na lamang sa dili pa ang presidential election gipagawas ang tingob nga P4 mil nga nag-antos na paglinya diha sa city hall.

Sama sa sentimento sa kampo ni kanhi Cebu City mayor Alvin Garcia sa Kugi Uswag Sugbu, ang mga opisyales sa Kapitolyo nagtuong usa kini ka matang sa pagpalit sa mga botos sa mga senior citizens ug mga pamilya niini aron mobotar sa mga kandidato sa Bando Osmeña Pundok Kauswagan kon BOPK.

Miangkon kining ang Kapitolyo migasto usab og milyon alang sa mga gatas, tsinelas, reading glasses, medical checkups, gagmay’ng livelihood program ug uban ngadto sa mga senior citizen pinaagi sa Provincial Social Welfare Office matag tuig gihapon apan wala silay gihatag nga kwarta. - BANAT NEWS