Dumpit mag-PFT gibabagan

CEBU, Philippines - Gibabagan sa mga abogado sa prosekusyon ang mosyon nga giduso ni SPO1 Adonis Dumpit nga naghangyo sa korte nga ipagawas ang maong polis sa usa ka adlaw alang sa pag-apil sa physical fitness test sa tanang mga sakop sa kapolisan sa Central Visayas karong Miyerkules Abril 14, 2010. Si Atty. Alfred Oguis, nangulo sa prosecution panel sa kasong murder ni SPO1 Dumpit nagkanayon nga dili sila mosugot nga pagawason ang polis sa gibilanggoan niini sa Criminal Intelligence and Detection Group (CIDG-7) bisan pa og ang upat ka mga police escort niini moapil usab sa maong physical fitness test (PFT). Kini tungod kay ang kasong murder nga giatubang ni SPO1 Dumpit usa man ka heinous crime ug usa ka kaso nga dili tugotan nga makapiyansa ang akusado.

Gipasabot ni Oguis nga dili usab makiangayon nga tugotan sa korte ang hangyo ni SPO1 Dumpit tungod kay wala malakip sa giduso niining mosyon ang kamanduan gikan sa labaw niini nga si Police Regional Office-7 director Chief Supt. Lani-o Nerez.

Si Oguis nagkanayon nga dili na kinahanglan pa nga moapil si SPO1 Dumpit sa PFT sa kapolisan sanglit wala na man kini nagsilbi isip polis tungod sa pagkabilanggo niini sa kasong murder.

Matud ni Oguis nga gikonsiderar nga ‘suspended’ si SPO1 Dumpit tungod sa pag-atubang niini sa maong kaso.

Ang kaso nagsumikad sa kamatayon sa usa ka Ronron Go niadtong nakalabay’ng tuig.

Apan si Atty. Pedro Leslie Salva, abogado ni SPO1 Dumpit mitumbok nga wala pa masuspenso si SPO1 Dumpit busa angayan lamang nga tugotang makasalmot sa kalihukan.

Tungod kay wala man makapakita ang abogado ni SPO1 Dumpit og kamanduan sa labaw niini nga motabang sa physical fitness test sa kapolisan, si RTC-7 Judge Ester Veloso mimando ni Salva ug mga kaubanang abogado sa depensa nga mokuha og written order gikan sa Police Regional Office -7.

Si Veloso miingon nga sa hearing karong adlawa, iyang dunggon pagbalik ang kaso ni SPO1 Dumpit ug modesisyon kun tugotan ba si SPO1 Dumpit nga makagawas sa karsel sa CIDG-7 ug makaapil sa PFT sa PNP. (BANATNEWS)