Kapitan sa Naga nasakmitan mga armas

CEBU, Philippines - Usa ka kapitan sa siyudad sa Naga nasikop sa gihimong operasyon sa Criminal Investigation and Detection Group (CIDG-7) ug Regional Intelligence Division (RID) tungod sa paghupot og mga armas nga walay lisensya.

Si Kapitan Federico Cabizares, 64, nasikop sulod sa ilang panimalay sa barangay Cabungahan, Naga.

Nasayran nga mipahigayon og joint operation ang CIDG-7 ug RID kabahin sa ilang nadawat nga taho sa mga gipanghuptan nga armas sa kapitan.

Ang pagpangronda gibase sa search warrant nga giluwatan ni Regional Trial Court Judge Silvestre Maamo niadtong Abril 6, 2010.

Sa pakisusi sa panimalay ni Cabizares, ilang nakuha ang .45 pistol, 12-guage shotgun, .22 caliber rifle ug pipila ka mga bala sa nagkadaiyang kalibre.

Matud ni Cabizares nga ang mga armas gikan sa iyang ginikanan diin aduna kini mga lisensya apan wala siyay gipakita sa kapolisan sa iyang giingong lisensya.

Dako ang pagduda ni Cabizares nga ang pagkasikop niya gipaluyohan og politiko apan nagdumili kini paghingalan.

Samtang ang panimalay usab sa usa ka tanod sa nahisgutang lugar nakuhaan usab og armas apan ang tanod daling nakaipsot human kini nakabantay sa pag-abot sa kapolisan.

Ang tanod nga si Joel Mangubat nakuhaan og improvised shotgun ug pipila ka mga bala. Matud pa ni CIDG chief Sr. Supt. Ramon Rafael nga mopadayon lang gihapon sila og pahigayon og pipila ka surveillance sa nagkadaiyang lugar kini aron ilang masikop ang mga politiko nga naghupot og walay lisensya nga armas.

Samtang si RID chief Sr. Supt. Melvin Buenafe mibutyag nga ang pagkasikop kang Cabizares tungod sa mga reklamo sa pipila ka mga residente sa nahisgutang barangay nga kanunay’ng magpabuto si Cabizares.

Nagtuo si Buenafe nga si Cabizares gamiton sa mga politiko sa umaabot eleksiyon, apan iyang giangkon nga wala silay ebidensiya nga ikasuporta niini.

Gihimakak hinuon ni Buenafe ang giingon ni Cabizares nga adunay nagpaluyo’ng politiko sa pagdakop kaniya, tungod kay nagtuman lang sila sa balaod, ilabi na ang gun ban nga gipatuman sa Commission on Election.

Mag-atubang og kasong kalapasan sa paghupot og armas ang atubangon ni Cabizares nga kasamtangang anaa sa kustodiya sa RID ug CIDG. (BANATNEWS)