CEBU, Philippines - Gipanghimakak ni Mayoralty candidate Nerissa Soon-Ruiz ang mga intriga nga mitumaw nga matud pa nabungkag ang ilang grupo ug nag-iyahay na lamang sila sa pagpahigayon og kampanya sa ilang kandidatura.
Ang 6th district Congresswoman nga nahinabi sa mga tigbalita sa The Freeman ug Banat News kagahapon miingon nga dili tinuod ang mga intriga nga nag-iyahay na lamang ang ilang grupo sa ilang pagpangampanya sukad sa pagtapon nila gikan sa Lakas Kampi CMD nga gipangulohan ni Presidential aspirant Gilbert Teodoro ngadto sa na Nationalista Party nga gipangulohan ni Presidential candidate Manuel Villar. Matud niya nga kon adunay higayon nga dili sila magkadungan sa house to house campaign nga ilang pagahimoon kana tungod usab sa mga kakulian sa ilang mga kauban apan wala magpasabot nga nabungkag na ang ilang grupo.
Dugang pa ni Kongresista Soon-Ruiz nga makita ang kalig-on ilang grupo sa mga political rally nga ilang gihimo nga motambong gayud ang tibuok grupo sa ilang partido.
Gitataw ni Soon-Ruiz `nga ang hingpit nga nabuwag na sa ilang grupo mao lamang si Board Member Wenceslao Gakit ug kini nahimo tungod kay nagpabilin man kini sa One Cebu party nga gipangulohan ni Gobernador Gwendolyn Garcia.
Apan sila si kanhi Mayor Thadeo Ouano nga kandidato sa pagka board member sa ikaunom nga distrito ug kanhi Board Member Gabriel Luis Quisumbing nga kandidato sa pagka kongresista sa ikaunom nga distrito nga gilangkoban sa Cordova, Consolacion ug dakbayan sa Mandaue walay kausaban hangtod niining panahona sukad sa pagsugod sa ilang pag-file sa ilang Certificate of Candidacy.