CEBU, Philippines - Saulogon ang ika-133 ka tuig nga sumad sa adlaw’ng natawhan ni kanhi Senador Vicente Yap Sotto, usa ka Sugboanon ug maoy labing una nga publisher sa Sugboanong newspaper “Ang Suga” ug author usab sa Press Freedom law, karong Abril 18.
Atol sa maong kalihukan mga gipaabot nga pagatambungan sa mga kabanay’ng Sotto ug sa mga suod nga higala niini, buksan pinaagi sa usa ka Santos nga misa diha sa Cebu Metropolitan Cathedral sa alas 8:00 sa buntag nga pasiugdahan ni Msgr. Boy Alesna.
Pagkahuman niini isunod ang flower offering nga pangulohan sa iyang apo nga si kanhi Dangerous Drugs Board (DDB) chairman ug kanhi senador Vicente Sotto III nga nagpasubli sa pagpapili og balik sa maong posisyon.
Matud ni kanhi DDB Undersecretary Paul Clarence Oaminal dihang nahinabi sa Banat News nga gipaabot nga magtagbo dinhi sa Sugbo ang tanang sakop sa pamilyang Sotto atol sa maong kalihukan.
Midugang siya nga kini himuon aron sa pahinumdom ug paghandom kang kanhi Don Vicente Sotto ilabina sa iyang mga maayong binuhatan dihang nagserbisyo pa siya sa gobyerno.
Si Don Vicente Sotto nagsilbi usab siyang miyembro kaniadto sa 1935 Constitutional Convention (Concon) ug naila usab nga amahan sa Cebuano literature.
Gipaabot nga mohatag og mubong pakigpulong atol sa maong okasyon si kanhi Senador Sotto III nga maghandom sa mga kaagi ug binuhatan sa iyang apohan kaniadto. – BANAT NEWS