Nagtangkil og armas de fuego natiklo

CEBU, Philippines - Gibalhug sa kapolisan ang usa ka tawo human kini hidakpi nga nagtangkil og armas de fuego nga wala’y lisensya didto sa barangay Mactan , dakbayan sa Lapulapu sa miaging gabii.

Ang nadakpan   mao si Anthony Nunez Bohio, 34 , minyo nga taga barangay Mactan ug ang nakadakop kaniya mao ang mga sakop sa Special Weapon and Tactics (SWAT) team.

Si Senior Inspector Joesan Parolol ug SPO2 Aldin Dano ug uban pang mga sakop sa SWAT sa kapolisan sa maong dakbayan mipahigayon og checkpoint sa maong lugar.

Matud pa ni PO1 John Philip Recafort nga nahinabi sa Banat News  nga sa sayo pa nakadawat ang ilang buhatan og taho kalabot sa usa ka tawo nga misulod sa usa ka establisamento nga nagdala og armas de fuego.

Dali nilang gitubag ang maong alarma pinaagi sa pagpahiluna og checkpoint sa maong lugar ug pipila ka takna ang nakalabay, ilang namatikdan ang paglabay sa maong suspetsado ug sa ilang pagrikisa sa kalawasan niini, ilang nakuha ang giluklok nga kalibre .38 nga revolver nga wala’y papeles.

Kasong paglapas sa Comelec gun ban ang ipasaka batok sa suspetsado. – BANAT NEWS