CEBU, Philippines - Ang grupo sa oposisyon sa dakbayan sa Talisay nga ubos sa Liberal Party (LP) mopahigayon og grand rally sa atbang sa atubangan sa city hall sa siyudad habig sa south coastal road sa barangay Lawaan II karong Martes sa gabii.
Si kandidato pagka-mayor, Bokal Raul Bacaltos mibutyag sa Banat News kagahapon nga sugdan nila ang ilang rally sa alas 6:00 sa gabii.
Iya nang gipahibawo nga tambungan ang maong rally sa mga kadagkuan sa partido nga pangunahan ni Senador Benigno “Noynoy” Aquino III, ang standard bearer sa LP, uban nila ni Senador Mar Roxas, ang kandidato pagka-bise presidente sa partido, mga kandidato sa pagka-senador ug ingon man ang mga kandidato sa pagka-gobernador ug bise gobernador nga sila si Hilario “Jun-Jun” Davide III ug Gregorio Sanchez niining lalawigan.
Ang grupo ni Noynoy gikatakdang unang mobisita sa lungsod sa Minglanilla sa mga alas 4:00 sa hapon sa nahisgutang adlaw ug molahos ngadto sa mga lungsod ug dakbayan nga sakop sa unang distrito unya mobalik kini sa dakbayan sa Talisay sa alas 8:00 sa gabii alang sa maong rally.
Matud pa ni Bacaltos nga ang maong pagbisita sa mga kandidato sa nasudnong posisyon, makahatag og dakung tabang kanila ug kahatagan usab og kahigayonan ang mga lokal nga supporter nga makahimamat sa mga kandidatong gusto nilang pilion sa umaabot nga eleksiyon karong Mayo 10, 2010.
Sa laing bahin, si Bacaltos nagkanayon usab nga nakahatag og pabor sa oposisyon kining hugon-hugon nga dunay mahitabong “junking” sa mga sakop sa administrasyon.
Kahinumdoman nga may mikatap nga isyu sa siyudad nga matud pa daku ang posibilidad nga sa kataposang adlaw sa kampanya adunay mga kandidato sa administrasyon ang mo-junk sa ilang mga kauban.
Gibutyag ni Bacaltos nga adunay mga taho nga ang mga sakop sa administrasyon wala gayud magkasinabot.
Midugang kini nga ang ilang grupo lig-on ug gikasabotan sa tanan nga wala sila’y biyaay.
Ug kung ugaling adunay usa ka kandidato nga mosukwahi sa kataposang adlaw sa pangampanya mahimong daghan ang makontra niini sa iyang kauban sa grupo. – BANAT NEWS