BOC sa Cebu nakaigo sa target

CEBU, Philippines - Milampos na usab ang buhatan sa Bureau of Customs sa Port of Cebu (BOC-POC) sa pagkab-ot sa ilang binulan nga koleksiyon sa buwan sa Marso ning tuiga diin milapas kini og 10.85% sa ilang target.

 Ang maong kalampusan gikalipay ni Cebu Customs District Collector Ronnie Silvestre tungod kay nakab-ot kini luyo sa kanihit sa gidaghanon sa importasyon niadtong bulan sa Marso ning tuiga.

 Matud pa ni Condrado Abarintos ang hepe sa cash division sa maong buhatan nga P655,803,000 ang ilang gi-apas nga collection target sa buwan sa Marso,apan ang katibuk-an nilang nakolekta mikabat og P726,940,564.03, busa misubra sila og balig P71,137,564.13.

 Samtang gibutyag usab ni Carlos Corsiga ang hepe sa assesment division nga sa milabay’ng bulan nihit kaayo ang importasyon nga miabot dinhi sa Sugbu apan gumikan sa ilang paningkamot sa paghatag og maayong serbisyo sa ilang mga kliyente, miburot ang ilang koleksyon.

 Niining bulana, Abril minus og dyutay ang ilang target nga kolektahunon kay kutob ra man sa P 647,708,000.00 kun itandi sa miaging Marso, apan dili gihapon sila mokompiyansa aron masiguro gayud nila ang kalamposan sa ilang tinguha.

 Usa sa mga paagi ni Silvestre aron makuha na usab nila ang target karon mao ang pagpasubasta sa ilang mga nakompiskar nga mga highly taxable goods nga anaa karon sa collector’s coral sa CIP aron mapalit na kini niadtong makadaog sa bidding.

 Ang subasta ipahigayon matag duha ka semana sa bulan sugod niining bulana ug ang tanang isubasta giandam na ni manlalaban James dee Buco ang hepe sa Legal division sa BOC-POC.

Lakip nga isubasta mao ang mga mahalon kaayong sakyanan nga ilang inimbargo gikan sa mga smuggler. (BANATNEWS)