Laptop sa Talisay pang-chat

CEBU, Philippines - Human sa milabay’ng duha ka tuig sa pagpamalit sa kagamhanan sa dakbayan sa Talisay og laptop alang sa gitawag nilang paperless session, o sesyon nga walay gamitay og papel, nabantayan karon nga gihunong na ang maong sistema ug mibalik na usab sila karon sa paggamit og papel atol sa ilang sesyon kay ang ilang mga laptop gigamit nalang sa pag-chat.

Gani matag Martes sa ilang regular nga sesyon, si Vice Mayor Alan Bucao kinsa maoy presiding officer magbitbit na og mga kopya sa ilang mga resolusyon ug ordinansa imbes nga laptop ang bitbiton.

“I’ve already told Vice Mayor Bucao about that, because their laptops are supposed to be for a paperless session, like what they have all agreed upon before they bought those units”, matud sa Sanguniang Panglungsod Secretary nga si Emigdio Enjambre Jr.

Gawas kang Enjambre sila si Konsehal Shirley Belleza ug Sabeniano Abatayo ug Sangguniang Kabataan Federation President nga si April Marie Cabigas usahay magdala sa ilang mga unit atol sa sesyon, apan imbis gamiton sa maong sesyon, gigamit lamang kini aron sa pagsil-ing sa ilang   mga facebook account ug sa pag-online chat.

Ang nahisgutang mga laptop nagkantidad og P47,000 ang matag usa, unya gipainstalahan dayon og wireless internet ang session hall aron sila maka-access ngadto sa internet.

Ang buhatan sa SP maoy mopadala sa mga order of business ug sa tanang attachment matag Biyernes sa email ngadto sa mga konsehal aron mahatagan sila og panahon sa pagtuon sa mga tukion sa umaabot nga sesyon.

Apan sukad gihunong sa mga konsehal ang pagdala og laptop, ang SP magpa-photocopy na lang sa mga order of business alang sa mga konsehal. (BANATNEWS)