CEBU, Philippines - Ang tigpamaba sa Kapitolyo Rory Jon Sepulveda nangayo og pasaylo kang Karla Kintanar Fernandez nga napasinginlan niyang namolitika tungod sa pagpangita niini og hustisya sa kamatayon ni kanhi Argao Tourism Officer Ted Villarimo.
Si Villarimo namatay sulod sa ambulansiya nga naghatod kaniya paingon sa tambalanan sa dakbayan sa Sugbo gikan sa Argao District Hospital sa miaging buwan nga walay kaubang doktor o kawani sa tambalanan.
Matud pa ni Sepulveda nga wala siya magtumbok nga si Fernandez ug mga kaubanan niini nga maoy namolitika kun dili kadtong nagsulat sa condemnation letter batok kang Gobernador Gwen Garcia nga gipatik sa internet.
"My personal apologies to her," matud pa ni Sepulveda ngadto kang Fernandez kinsa usa sa mga iladong tawo nga nisaway sa pagdumala sa gobernadora sa Kapitolyo.
Si Sepulveda miingon nga ang ilang gitumbok karon nga namolitiko mao si Tudd Lucero Sales kinsa miangkon nga siya maoy author sa naasoy nga condemnation letter batok sa gobernadora.
Gani gipahibawo ni Sepulveda nga si Sales ilang pasakaan og kaso ngadto sa korte ug himoon nilang ebidensiya ang gisulat niining pagkondinar sa gobernador.
Hinuon giklaro ni Sepulveda nga mahimong dili nila ipadayon ang maong kiha kun kurihian ni Sales kadtong iyang gisulat diha sa internet. (BANATNEWS)