Pelaez manglimpyo sa Lapulapu

CEBU, Philippines - Ang negosyanteng si Efrain Pelaez Jr. maoy dinapit sa The Freeman sa roundtable discussion sa maong pamantalaan kagahapon.

Si Pelaez, 60-anyos, kinsa mikandidato sa pagka- mayor sa dakbayan sa Lapu-Lapu kaatbang ni Kapitan Paz Radaza sa barangay Mactan, sa maong dakbayan kinsa mikandidato usab sa pagka-mayor alang sa umaabot nga piniliay sa Mayo 10, mipadayag nga gusto niyang usbon ang sitwasyon sa panggobiyerno sa maong siyudad.

Matud ni Pelaez nga kung siya ang mapiling mayor sa Lapulapu usa sa iyang wagtangon mao ang kurapsiyon aron modaghan ang mga investor nga mobubo og puhonan sa negosyo sa maong lugar alang sa kaayohan sa taga Lapu-lapu.

Si Pelaez misaway sa kasamtangang pangagamhanan sa maong siyudad kay wala kini makalimpiyo sa palibot gikan sa naghitak nga mga basura   nga makauulaw kaayong tan-awon ilabi na sa mga turista nga mosuroy sa dakbayan.

Gani ang maong basura milanat na og sulod sa siyam ka tuig hangtod karon nga walay hipos-hipos, nga kini nagkahulogan lamang sa pagpabaya sa nagdumalang mga opisyal sa maong lugar.

Midugang si Pelaez nga naikag siya sa pagpapili isip mayor sa siyudad aron mausab ang dagan sa panggobiyerno niini ug mahunong na ang mga illegal collection diha sa merkado, terminal ug sa uban pang mga patigayon.

Gibutyag ni Pelaez nga mikatap usab ang ilegal nga drugas sa Lapu-Lapu tungod kay adunay mga opisyal sa siyudad ang mitugot niini.

Gibutyag niya nga ang iyang “plata porma de gobiyerno” mao ang “common sense platform”.

“My platform is a common sense platform, one, you have to stop the graft and corruption, second, all the illegal collection must be stopped”.

Ang bisan kinsa nga anaa sa gobiyerno nga mangolekta og kwarta nga walay hustong resibo kinahanglang dakpon ug pahamtangan og tukmang silot, matud ni Pelaez.

Giangkon sa maong negosyante nga maayo ang pagkabutang sa iyang pamilya kay ang iyang amahan   usa ka kanhi   abogado, ug sa dakbayan sa Sugbo sila ipanganak, unya gipatungha sa ilang mga ginikanan sa mga inilang tunghaan sa dakbayan sa Sugbo, Manila ug ngadto sa Estados Unidos.

 Apan bisan pa niini, miingon siya nga dili siya usa ka mata pobre, ug gani daghan siyang natabangang kabus didto sa Lapu-Lapu pinaagi sa paghatag og scholarship bisan kaniadtong wala pa siya mosalmot sa politika.

Kahinumdoman nga si Pelaez ug si Mayor Radaza nagkabangi dihang ang nahauna mipasaka og kaso ngadto sa Ombudsman batok sa mayor.

Gipasira usab sa mayor ang Marina Mall ni Pelaez tungod sa giingong wala kini mosubay sa tanang gipangayo sa balaod alang sa padaganong negosyo.  (BANATNEWS)