CEBU, Philippines - Usa ka hubog namahad ug nanghagad og pinusilay sa hepe sa City Assessors Office sa Talisay City Hall niadtong Huwebes sa hapon.
Si Ma. Alma Abellanosa, hepe sa maong buhatan gibati og kahadlok ug nanawag og tabang sa mga sakop sa Civil Security Unit (CSU) sa city hall sa dihang si Alfredo Cañete, 50, taga barangay Tabunok, Talisay nanghasi kaniya.
Si Cañete nagtingkagol sa Talisay City detention cell human masikop ni Jun-Jun dela Rosa, sakop sa CSU.
Si dela Rosa nga nahinabi sa Banat News mibutyag nga si Cañete giingong hubog nga nagdala og resita sa tambal ug miadto sa buhatan sa city social welfare nga diha usab nahimutang sa city hall aron mangayo og tambal.
Human mahatagi og tambal mihapit si Cañete sa buhatan sa city assessors ug mideretso og duol kang Abellanosa ug giingong nangayo og kwarta.
Matud ni dela Rosa nga ang department head nahingangha ug namalibad nga wala kini makaila kang Cañete ug sa maong sitwasyon nasuko ang suspek ug nanghagis diha sa sulod sa buhatan sa hepe.
Wala pa matagbaw si Cañete mibahad pa kini nga nagkanayon “may adlaw ra ka mam nga mosaka sa among bukid, ari sa gawas kay magpinusilay ta.” – BANAT NEWS