Lola gitulis, gidaoban

CEBU, Philippines - Gitulis ug pagkahuman gidaoban sulod sa iyang payag ang usa ka 70-anyos nga lola nga bag-ohay lang nahalinan sa iyang kabaw sa bukirang bahin sa sitio Law-ang, barangay Tigbao, lungsod sa Badian niadtong Huwebes sa alas 8 sa buntag.

Nasunog ang kalawasan hinungdan sa kamatayon ni Masing Auditor, 70, apan dalagang guwang ug usa ka mag-uuma sa nahisgutang lugar. Matud ni PO3 Emmanuel Caballero sa Badian Police Station sa dihang nahinabi sa Banat News nga sa imbestigasiyon nasayran ang pag-umangkon ni Lola Masing nga si Raul Auditor maoy nakadiskobre kaniya nianang pagkabuntag nga naugdaw na ang payag nga gipuy-an sa biktima ug napagod na usab ang patay’ng lawas sa tigulang.

Dugang impormasiyon nga nahipos sa kapulisan gikan sa igsuon ni Lola Masing nga si Virgilio Pizarra nga gituohang gitulis ug pagkahuman gipatay ang biktima pinaagi sa pagsunog sa payag niining gipuy-an.

Dugang sa pag-umangkon niini nga si Lola Masing nahalinan og kabaw duha ka adlaw sa wala pa ang hitabo ug gituohan nga namatikdan kini sa mga suspek ug gitulis ug gipatay ang biktima sanglit mao lang kining usa ang nagpuyo sa payag ug layo kaayo sa mga silingan.

Nasayran nga si Lola Masing pagaduawon lang sa iyang mga kabanay ug hatdan lang og pagkaon ug sa uban pang panginahanglan niini.

Hinuon ang mga kabanay ni Lola Masing nagdumili na nga ipa-autopsy ang patay’ng lawas tungod kay gusto nila nga mapahiluna na lang kini sa lubnganan.

Ang kapolisan padayon pa sa pag-ila ug pagsikop sa mitulis ug misunog sa tigulang. – BANAT NEWS