Walay basehan aron ibalhin si Loot - Nerez

CEBU, Philippines - Giklaro sa pangulo sa kapolisan sa tunga-tungang kabisay-an Chief Supt. Lani-o Nerez nga walay igong basehanan ang pasangil ni Daanbantayan mayoralty candidate Augusto “Itok” Corro ngadto kang Sr. Supt. Vicente Loot nga nag-apil-apil kini sa politikanhong kalihukan sa iyang asawa nga si Bise Mayor Ma. Luisa Loot kinsa maoy kaatbang ni Corro sa pagkamayor karong umaabot nga eleksyon.

Si Corro bag-uhay lang misaway sa PRO-7 gumikan sa walay aksyong gihimo batok sa mga reklamong iyang gisang-at pipila ka semana na ang nakalabay ug giingong nagpakabuta-bungol lamang si Nerez bahin niini.

Buot ni Corro nga ipabalhin og laing dapit si Loot gawas sa Central Visayas.

Apan mipasabot si Nerez nga ang pasangil ni Corro susama ra gihapon sa mga nauna nilang pasangil sa milabay'ng piniliay niadtong 2007 batok kang Loot.

Gani giduso naman kini ngadto sa buhatan sa Visayas Ombudsman ug ubang ahensya sa gobiyerno lakip na niini ang National Bureau of Investigation (NBI)-7.

Dugang pasangil sa kampo ni Corro nga overstaying na si Loot sa PRO-7. Apan si Nerez mipasabot nga dili overstaying ang maong opisyal sanglit anaa man tuod kini apan gibalhin og laing posisyon ug gani sa pagka karon si Loot mao man ang hepe sa Philippine Center on Transnational Crime (PCTC) diin ang cover niini ang tibuok Central Visayas apan nakabase kini iyang buhatan atbang sa PRO-7 sa may Jones Avenue.

Giklaro niini nga bukas iyang buhatan sa tanang reklamo ug labaw sa tanan matud ni Nerez nga wala nila kini katulgi ug ilaha gyung gi-aksyonan ang tanang reklamo nga madangat sa iyang buhatan.

Subay niini nagkanayon siya nga sa pagka karon magpabilin gihapon si Loot diha sa PCTC ug layo ra ang posibilidad nga ibalhin kini og laing lugar. – BANAT NEWS