Kawani sa MEPZ1 gitulis
CEBU, Philippines - Empleyadong babaye sa MEPZ 1 gitulis ug gidunggab didto sa sitio Cemento, barangay Pusok, dakbayan sa Lapulapu kagahapon sa kaadlawon.
Ang biktima mao si Aimarie Capuyan Fajardo, 21, dalaga, nagpuyo sa sitio Seawage, barangay Pusok, dakbayan sa Lapulapu ug nagtrabaho sa MEPZ 1.
Base sa imbestigasyon ni SPO3 Rex Ibanez sa Crime Against Person desk sa Lapulapu nasayran nga mga alas 5:10 kagahapon sa kaadlawon padulong na unta sa iyang trabaho si Fajardo sa dihang miabot ang nag-inusarang tulisan ngadaling mideklarar og tulisdungan ang pagtion og kutsilyo.
Bisan pa sa maong kahimtang si Fajardo, misukol kini ngadto sa tulisan sa dihang giputol ang sling sa bag niini hinungdan nga kini gidunggab.
Si Fajardo dali nga gidala sa Lapulapu City Hospital ug anaa pa kini ubos sa obserbasyon sa mga doktor human kini mahiagum sa usa ka samad dinunggaban sa iyang kilid sa lawas.
Matud pa ni Fajardo walay angayang kabalak-an sa pagkakuha sa iyang bag sa tulisan gumikan kay walay kuwarta sa sulod niini diin pipila sa mga importanteng butang lamang ang nawagtang sama sa ID.
Human sa malampusong pagpanulis dali kaayo nakapahilayo sa maong dapit ang tulisan. – BANAT NEWS
- Latest
- Trending
