CEBU, Philippines - Kapolisan sa dakbayan sa Talisay duna nay gisundang tawo bahin sa pagpusil patay sa usa ka asset sa polis nga dispatser niadtong Martes sa buntag diha ilawom sa flyover sa Tabunok.
Kahinumdoman nga si Victoriano Tabliga kinsa nakaangkon og samad pinusilan sa tuong bahin sa iyang liog human gipusil sa usa ka lalaki samtang naglingkod diha sa jeepney.
Si PO3 Mikie Espina sa homicide section kinsa usa sa mga gitahasan sa pagpahigayon og lawom nga imbestigasyon mibutyag kagahapon sa Banat News nga dunay witness sa maong insidente nga maoy miila sa kriminal.
Apan ang maong saksi nagdumili sa pagtungha sa ilang buhatan hangtud nga madakpan ang suspetsado tungod kay nahadlok kini, wala usab ibutyag ni Espina ang pangalan sa suspetsado tungod kay padayon pa nila kining gipangita.
Gibutyag usab ni Espina nga ang nahisgutang suspetsado dunay kaso sa pagpanulis ug pagpatay gani duna sila’y warrant of arrest niining gihuptan sa kasong murder.
Ang kapolisan wala pay nahipos nga mga impormasyon sa motibo sa pagpatay sa biktima apan duha sa ilang gitutokan karon nga posibilidad nga dunay nasuko kang Tabliga isip dispatser tungod kay kini ra maoy gihatagan og certification sa mayor nga maka-dispatser samtang ang uban badlungon ug gipangsikop. – BANAT NEWS