2 tindera gitulis, gitanggong sa tulisan
CEBU, Philippines - Gitulis ug gitanggong sa usa ka tulisan ang duha ka tindera lakip na ang tag-iya sa tindahan og itlog diha kilid sa simbahan sa barangay Guadalupe kagahapon.
Si SPO4 Geoffrey Diola sa Theft and Robbery Section (TRS) sa Cebu City Police Office miila sa tag-iyang gitulis mao si Maxima Tan, usa ka retired public school teacher ug supplier og itlog sa pipila ka mga dapit dinhi sa dakbayan sa Sugbu.
Mokabat og P60 mil ang nadala sa nagbinugtong tulisan nga naglakip sa kwarta, laptop, ug usa ka cellphone.
Subay sa nahipos nga impormasyon sa TRS, si Diola mitug-an sa mga tigbalita nga nanuktok sa gate ang tulisan ug dihang giablihan sa katabang nangutana kini kun makapalit ba kini og daghang itlog.
Apan gitubag kini ni Tan nga adto nalang sa ilang poultry makapalit hinungdan nga milakaw kini apan kalit mibalik dayong tion sa dala niining revolver ngadto ni Tan ug mideklarar og tulis.
Human makuha ang salapi ug mga butang gitanggong sila sa usa sa mga lawak ug gibaharang duna kini kaubang armado diha sa gawas nga mobantay.
Anha lang migawas ang mga biktima dihang nakabantay nga mingaw sa gawas ug mipahibalo sa kapolisan. – BANAT NEWS
- Latest
- Trending
