CEBU, Philippines - Tungod lang sa daob sa mga sagbot , sa duha ka andanang panimalay nga gipanag-iya ni Zamboanga City Mayor Celso Lobregat naugdaw kagahapon sa buntag diha sa Nivel Hills sa barangay Lahug ning siyudad.
Nadawat ang alarma sa kabomberuhan alas 10:32 ug nakontrolar dayon sulod lamang sa singko minutos ug gipaubos sa second alarm.
Si Cebu City Fire Marshal Supt. Ismael Codilla nga nahinabi sa mga tigbalita mibana-bana sa danyos nga miabot og P300 mil.
Matud pa ni Codilla taud-taod nang gibiyaan sa pamilyang Lobregat ang maong balay ug ang caretaker nga magtiayong Tojeno nga si Anecito ug Carmen uban sa ilang anak ug apo mao nalang ang nag-atiman niini.
Base sa imbestigasyon nasutang nagdaob sa mga sagbot ug basura si Anecito sa ubos ug atubangan sa maong panimalay.
Apan giingong tungod sa kusog nga hangin ug gituuhang dunay aligato nga nadala ug mitugdon sa second floor ug wala madugay misilaob.
Hinuon walay gikatahong naangol sa maong sunog, apan duna lang hinuoy duha ka fire truck nga wala makapasirit og tubig tungod kay dunay deperensya ang pumps tungod sa kakaraan.
Si Codilla mipahimangno sa publiko nga likayan ang pagdaob ug kung mohimo sila niini kinahanglang mananghid kanila aron ilang pa-estambayan og usa ka fire truck. – BANAT NEWS