CEBU, Philippines - Si Mayor Celestino “Junie” Martinez sa dakbayan sa Bogo mipasangil sa mga sakop sa Regional Mobile Group (RMG) nga nagbase sa maong dakbayan nga giransak ang iyang safehouse sa miaging gabii.
Ang mayor mitawag kagahapon sa buntag ni Sr. Supt. Erson Digal, hepe sa kapolisan sa lalawigan aron ipahibalong giransak ang iyang safehouse sa barangay Buac sa mga sakop sa RMG nga gipangulohan ni Insp. Ariel Arellano.
Apan si Digal sa pakighinabi sa mga tigbalita hugtanong mihimakak sa maong pasangil sa mayor. Matud pa niya nanawag kaniya si Arellano ug nagpahibalong mopahigayon sila og patrolya sa maong lugar tungod sa giingong nadawat nga report nga dunay mga armadong tawo sa barangay Buac.
Si Digal nagkanayon nga nakit-an nila ang mga tawong naglakaw-lakaw sa gawas apan dili ingon nga giransak o gisulod ang safehouse sa mayor.
Sumala pa ni Digal nasayod ang iyang mga sakop nga dili sila mahimong mosulod sa usa ka panimalay kun wala’y igong basehanan ug ilegal kini gawas lang kun dunay search warrant.
Ang RMG giingong igo rang milahos ngadto sa barangay hall sa barangay Cayang diin nakit-an ang tulo ka tanod, usa kanila gituuhang sakop sa City of Bogo Anti Crime Task Force (CBACTF) nga paghulagway ni Arellano kang Digal daw nangahadlok pagkakita sa mga polis.
Gikatahong dali-daling gipang-lock sa mga tanod ang mga cabinet sa barangay hall busa wala nila kini hilabti ug namauli nalang ang mga RMG.
Tungod niining maong pasangil sa mayor, si Digal mimando dayon sa hepe sa Bogo Police Station Supt. Julian Entoma nga mopahigayon og lawom nga imbestigasyon aron masuta unsa ka tinuod ang maong pasangil.
Matud ni Digal sa ilang panag-estorya ni Martinez iyaha gihimakak ang alegasyon, gikatahong mipahibalo kaniya si Martinez nga mopadala og suwat kang PNP Chief Jesus Versoza tungod kay wala na kini pagsalig sa lokal nga polis.
Giklaro ni Digal nga pabilin silang neutral ug walay gidapigan ni bisan kinsang politiko ang mga polis. – BANAT NEWS