CEBU, Philippines - Nadugtang patay’ng lawas nga gituohang iya sa usa ka dalagita ang napalgang patay sa usa ka hilit nga bahin sa bung-aw sa barangay Tangke lungsod sa Naga pasado alas 4 sa hapon sa miaging adlaw.
Ang maong dalagita gibana-banang nagpangidaron og 17 ngadto sa 18 anyos ug nagsul-ob og lalag nga polo-shirt ug puti nga shorts apan walay nakuhang dokumento ang mga imbestigador aron mag-ila kaniya.
Sa pakighinabi sa Banat News ni PO2 Cristino Canono mibutyag kini nga si Kapitan Mel Cardines sa barangay Tangke mao nay mitaho sa ilang buhatan human kini makakaplag sa nagbuy-od nang patay’ng lawas sa usa ka babaye.
Nagduda usab si Canono nga posibleng dugay nang namatay ang maong babaye base usab sa kahimtang sa patay’ng lawas niini.
Wala usab isalikway ni Canono nga posibleng natagak ra ang biktima gikan sa bung-aw apan hangtod ning pagsulat sa balita walay bisan usa ka molupyo nga miduol sa kapolisan kabahin sa na-missing nga kabanay.
Lakip sa gisusi sa kapolisan ang posibilidad nga dili residente sa maong dapit ang maong dalagita ug gidala diha sa maong dapit ug anha gitambog, sa pagkakaron walay ideya ang kapolisan kun gipatay ba kini ug giamong-amongan.
Ang patay’ng lawas gipahimutang diha sa Saint Francis Funeral Homes alang sa awtopsiya aron sutaon ang gikamatyan niini apan sumala pa uwahing kalamboan kagahapon sa hapon gikatahong walay foul play nga nakita sa patay’ng lawas niini. - Lesley Caminade ug Georgette Solitario (BANAT NEWS)