CEBU, Philippines - Si kanhi Chief Justice ug kanhi UN Ambassador Hilario Davide Jr. nanawagan sa mga mikandidato sa presidential election ug local elections sa Mayo 10 nga dili gamiton ang mga kabus sa ilang pagpangampanya.
Matud pa ni Davide nga dili makiangayon ang paggamit sa mga kandidato sa mga kabos ug manaad nga sulbaron ang kakabos sa mga Filipino aron lamang makakuha og simpatiya ug botos.
Gihulagway ni Davide nga pagpahimulos kini sa kakabus sa mga tawo ug misugyot nga ang angayang buhaton sa mga kandidato mao ang pagpakita sa ilang pagkamatinud-anon, serbisyo, makatarunganon ug makiangayon.
Samtang sa laing bahin, giklaro ni Davide nga maoy principal author sa provision sa Batakang Balaod nga nagdili sa presidente nga makapahigayon og midnight appointments sa bisan unsang posisyon sa gobiyerno mga duha ka bulan sa dili pa ang election ug hangtud na sa iyang pagkapupos sa termino.
Giklaro ni Davide nga “absolute prohibition” sa presidente ang nalatid sa balaod. Si Chief Justice Reynato Puno gikatakdang moretiro karong Mayo 17 ug gikabalak-an sa mga kritiko sa pangulo nga mabutang sa pagduda ang mga desisyon unya sa mahistrado ilabi na karong mapupos na ang termino ni Arroyo ug midagan na usab karon sa pagkakongresista.
Apan tungod kay nakadesisyon naman ang Korte Suprema nga mahimong makatudlo si Arroyo og mopuli kang Puno, dili una siya mokomentaryo kabahin niini sanglit duna pay pending nga mosyon kabahin niini. - Chester Abadilla (BANAT NEWS)