'Asset' sa Talisay gitipi

CEBU, Philippines - Patay ang usa ka asset sa polis nga dispatser diha sa barangay Tabunok, dakbayan sa Talisay human kini pusila samtang nanawag og mga pasahero ilawom sa fly-over kagahapon sa buntag.

Sila si SPO1 Ricardo Balbutin, miila sa biktima nga si Victoriano Tabliga, 58-anyos, residente sa sitio Mananga 2, Tabunok nakaangkon og samad pinusilan sa tuong bahin sa li-og ug daling gidala ngadto sa Talisay City District Hospital apan wala na kini makaabot nga buhi sa maong tambalanan.

Si PO1 Jundave David nga nahinabi sa Banat News kagahapon mibutyag nga duha sa mga motibong ilang gitutokan karon mao ang kabahin sa pagka-dispatser ug pagka-asset niini.

Kahinumduman nga niadto ang mga dispatser nga mga badlungon gipangsikop ug si Tabliga ray nagpabilin ug gihatagan kini og certification gikan sa mayor nga nagtugot nga magpadayon kini sa iyang pagkadispatser.

Gibutyag usab ni David nga si Tabliga maghatagan usab ngadto kanila og mga impormasyon kabahin sa mga tawong badlungon ug pinangita sa balaod nga naa magtago diha sa sitio Mananga, Tabunok.

Base sa pasiunang imbestigasyon sa kapolisan si Tabliga wala kini nakaaway o nakalalis sa wala pa kini pusila.

Ang drayber sa jeepney nga gidispatseran ni Tabliga nga dunay rotang Tabunok-Citi Link mihimakak nga nakakita sa mamumuno tungod kay natulog siya diha sa front seat samtang si Tabliga nanawag og mga pasahero. – BANAT NEWS