CEBU, Philippines – Paghatag og trabaho alang sa tanang Sugbuanon maoy nakitang solusyon sa kandidato sa pagkamayor sa dakbayan sa Sugbu nga si Atty. Salvador Solima aron mahaw-as ang mga kabus.
Matud pang Solima ang mga nangaging lider sa dakbayan pulos nasayop sa ilang mga prayoridad tungod kay bisan pa og usa ka gatos ka tuig nga molingkod ang susamang mga klaseha sa mga lider magpabiling kabus ang mga tawo.
Sumala pa niini nga dili prayoridad sa mga nangaging mga mayor sa dakbayan ang paghatag og trabaho sa tanang nanginahanglan niini sanglit mas giuna nila ang mga pagpatukod og mga proyekto.
Matud pa niini nga giapas lamang sa mga opisyal ang makuhang komisyon gikan sa maong mga proyekto maong wala na mahatagi kaayo og atensyon ang panginahanglan sa trabaho.
Kun siya’y palarong modaog pagkamayor, buot niyang mopatuman og tulo ka tuig nga moratorium sa pagbayad sa siyudad sa mga utang niini lakip na ang balayrunon ngadto sa Japan tungod sa katukoran sa South Reclamation Project.
Sumala pa niini ang kwartang ibayad sa mga gipangutang sa dakbayan adto tanan ihapak sa mga programang makahatag og dinaliang trabaho sa mga unemployed.
Nagtuo siyang paigo na ang maong gidugayon aron makabarog ang mga tawo gikan sa kakabus, gawas pa niini masaligon siyang mahalin ang mga luna sa SRP ug ang halin mahimo nang magamit pagbayad sa utang.
Samtang gustong motukod ni Solima og satellite markets alang sa mga sidewalk vendors, pagbalhin sa Carbon Market sa mas paborableng lugar tungod kay mas maayong paninduton ang pantalan.
Buot usab ni Solima nga palambuon pa ang Cebu City Medical Center gumikan sa gihulagway niyang wala kini matarong og dumala sa siyudad maong kanunay’ng daghang reklamo kabahin sa serbisyo niini.
Si Solima mitapos sa kursong abogasya pinaagi sa iyang kaugalingong paningkamot isip usa ka working student, nagtrabaho siya isip kaminero kaniadto diha sa Carbon Market.
Si Solima maoy abogado sa dakbayan sa Sugbu niadtong dekada 80 dihang gipasakaan sa dakbayan og kaso ang Toledo City aron makuha ang hurisdiksyon niini sa barangay Sinsin ug barangay Sudlon nga gibana-banang 9,000 ka hektaryas ang gilapdon, ang dakbayan sa Sugbu midaog sa maong kaso gikan sa lower courts hangtud sa Korte Suprema. - Edwin Ian Melecio (BANAT NEWS)