Botante padad-o'g kodigo

CEBU, Philippines - Higpit nga gipasidan-an sa Commission on Eelections (COMELEC) ang mga kandidato sa dili pagpanghatag og mga sample ballot ngadto sa mga botante sa adlaw sa piniliay ilabi na kun padulong na sa presintong botahanan ang mga pumipili.

Ang maong pasidaan gihimo ni Provincial Election Officer Lionel Marco Castillano kinsa nagkanayon nga kun ang botante may dalang sample ballot nga silbing kodigo niya o kopyahanan sa iyang pagboto, gitugot ra kini sa Comelec.

Gipasabot ni Castillano nga kadtong magdala og sample ballot gikan sa ilang balay aron may tamdanan siya sa mga pilionon niyang kandidato, katungod kini sa usa ka botante kinsa naningkamot nga dili siya malipat ug dili masayop sa pagpili niya sa gusto niyang botohan.

Matud pa ni Castillano nga gumikan sa kadaghang kandidato nga magpapili, lisod kaayo kun walay dalang kodigo ang usa ka botante, ilabi na kadtong mga pumipili nga may kausaban uban sa mga kaubanan nila sa organisasyon, asosasyon o kaha relihiyon.

Apan ang pagpanghatag og sample ballot sa adlaw sa election maoy higpit nga gidili sa Comelec sanglit maghatag kini og kahasol sa botante.

Sa samang higayon giawhag ni Castillano ang mga botante nga aron kalikayan ang kalangay sa pagboto, kinahanglang mosayo pag-adto sa presinto aron sa pagpangita sa mga ngalan ug sa numero sa presinto diin siya angay nga mobotar.

Gitataw ni Castillano nga dili angay kompiyansahan kining electiona kay mao pa kini unang highayon sa mga Pilipino nga mogamit og computer sa pagboto, lahi kaniadto nga mano-mano lang.

Sa mano-mano , mahimo ra kun ang mga botante moadto na sa katapusang oras o hapit na manak-op oras sa botasyon tungod kay sayon ug naandan na kadto sa tanan.

Apan kining automated election lahi kay moderno na kaayo ug wala pa kini masuwayi sa tanan sukad-masukad dinhi sa nasud. – BANAT NEWS