CEBU, Philippines - Usa ka barangay tanod gipasanginlang namusil sa iyang silingan apan wala kini makaigo didto sa sitio Litmon, barangay Dumlog, dakbayan sa Talisay kagahapon sa buntag.
Ang mga biktima nga giingong nasuwertihan kay wala matusak sa bala mao ang managsuong Catalino Lungay, 41, taga barangay Maghaway; ug ang igsoon niyang si Francisco Lungay, 33, taga Litmon, pulos sakop sa dakbayan sa Talisay.
Samtang ang suspetsadong tanod mao si William Omiter, hingkod nga taga Litmon, silingan ni Catalino.
Atubangan sa mga imbestigador sa kapolisan, si Francisco ug Catalino mitug-an nga misulod si Omiter sa panimalay ni Catalino unya gipamusil sila niini ug maayo nalang kay wala sila maigo.
Hinuon si Omiter nga miadto usab sa presinto sa kapolisan mihimakak sa maong pasangil.
Mibahad ang mga biktima nga pasakan nila og kaso si Omiter. – BANAT NEWS