Bana giluba sa asawa nga nasuko

CEBU, Philippines - Nagtingkagol sa Talisay city detention cell ang usa ka asawa human kini manunggab sa iyang bana tungod sa kasuko nga dili ilang bugas ang gilung-ag sa bana kagahapon sa buntag diha sa sitio Salvador, barangay Tanke, dakbayan sa Talisay.

Ang biktima mao si Juanito Nuñez, 33, mananagat ug ang   asawa nag-edad og 31-anyos.

Si Juanito nakaangkon og samad dinunggaban sa walang paa ug garas sa bitiis ug daling gidala sa Talisay City District Hospital ug gibalhin sa Vicente Sotto Memorial Medical Center.

Base sa imbestigasyon nila ni PO3 Mikie Espina ug PO2 Stephen Sefuesca nga sa dihang naabot gikan nanagat si Juanito, natulog pa ang asawa niini hinungdan nga giluto na lang sa biktima ang iyang kuha nga mga isda ug ang bugas nga gibilin sa iyang igsuon nga babaye diha sa ilang balay.

Human og luto ni Juanito, gipukaw niya ang iyang asawa aron pakan-on na apan dihang nakahibalo ang asawa nga dili ilang bugas ang giluto sa iyang bana nanghasi kini.

Matud ni Espina nga gipamoak sa asawa ang ilang mga plato ug sa kapungot ni Juanito ug sa rason nga siya’y maoy namalit sa ilang mga plato mitabang usab kini og pamuak sa plato.

Dihang nahurot na og buak ang mga plato gihinay-hinayan sa asawa og guba ang ilang payag ug sa kapungot usab sa bana ug sa rason nga siya’y naggasto sa pagpatukod sa ilang payag gitabangan usab niya og guba ang   payag.

Sa dihang nabungkag na ang payag mikuha og kutsilyo nga dunay gitas-ong unom ka pulgadas ang asawa ug gihansak ngadto sa iyang bana.

Human sa panunggab milakaw ang asawa ug nakig-inom kini sa ilang silingan, apan gisikop kini nila ni Espina ug Sefuesca. – BANAT NEWS