Sugat sa Minglanilla gidugok gihapon

CEBU, Philippines - Sama sa milabay'ng mga tuig gidagsa sa mga tawo ang “Sugat” sa lungsod sa Minglanilla nga gihulagway kaniadto pa nga maoy labing nindot og presentasyon panahon sa Pasko sa Kabanhawan dinhi sa Sugbu.

Sumala pa sa mga polis nga nagbantay sa maong kalihukan milanat og duha ka oras una pa hingpit nga nakauli ang tanang mga nanan-aw nga mipuno sa tibuok sports complex lakip na sa dalan sa barangay Poblacion Ward I nga gisugdan alas 2:00 sa kaadlawon kagahapon.

Sa re-enactment ang dautan ug ang katarong nagsangka diin dunay duha ka tawo nga ibitay nga mag-costume og Anghel (Archangel Gabriel) nga nagrepresentar sa katarong ug itom nga Agila nga nagpresentar sa dautan.

Sa pipila ka minutong panagsangka ug nabuntog ang dautan migawas dayon ang mga batang kerubin nga nagpatingog sa trumpeta nagpahibawo sa pagkabanhaw ni Hesukristo ug sa panagtagbo nila sa iyang inahang si Birhen Maria.

Ang presentasyon sa Sugat sa Minglanilla usa ka “unique” tungod kay dunay mga bata nga ibitay og harness nga gipasul-ob og costume nga sama sa usa ka Anghel ug kunohay naglupad kini ug dunay usa kanila ang motangtang sa bronda nga itom nga gipandong sa imahen sa Birhen Maria.

Sama usab sa milabay'ng tuig ini’g gawas sa mga karong gibutangan sa mga imahen maupaw na kini og mahurot ang mga giadornong buwak tungod kay kuhaon sa mga tawo nga nanan-aw tungod sa pagtuong swerte kini sa negosyo ug tambal usab sa sakit.

Ang brondang itom nga gipandong sa imahen ni Birhen Maria ampingan gyud kini pag-ayo sa batang Anghel nga mitangtang niini aron dili mailog sa mga tawo tungod kay siguradong maguhay-guhay kini.

Daghan ang nagtuo nga ang maong panapton swerte sa panagat.

Sa laing bahin, si Chief Inspector Jovito Canlapan hepe sa Minglanilla Police Station sa pakighinabi niini sa Banat News kagahapon nagkanayon higpit ang pagpatuman sa seguridad sa venue.

Duha ka team sa Regional Mobile Group ug 35 ka mga polis nga gikan sa provincial head quarter ang gipakatap diha sa lugar.

Ang sakop sa Philippine Drug Enforcement Agency-K9 ang miposte usab diha sa nahisgutang lugar ug dunay mga sakop sa Traffic Management Group (TMG) ang nagmando sa trapiko.

Human sa kalihukan sa Sugat gihimo usab   pagkahapon ang kalihukan sa “Kabanhawan Festival” diin dunay gipahigayong street dancing. – BANAT NEWS