CEBU, Philippines - Usa ka edipisyo sa eskuylahan nga gigahinan og mga P100 milyones sa kagamhanan sa Belgium gitakdang tukoron sa sulod sa campus sa Lawaan Elementary School (LES) sa dakbayan sa Talisay.
Ang seremonyas sa paglungag sa yuta nga tarokan niini gihimo niadtong Lunes sa buntag nga gitambungan sa mga kadagkuan sa Department of Education (DepEd) ug sa taga Department of Agrarian Reform (DAR). Ang luyoluyong director sa DAR nga si Maria Lourdes Mariano mitug-an sa Banat News nga silay naningkamot nga matukod ang maong tulunghaan diha sa LES pinaagi sa abag sa kagamhanan sa Belgium.
Kini pinaagi sa proyekto nga gitawag nga Belgian Integrated Agrarian Reform Project nga mitugyan sa iyang pagsalig ngadto sa DAR aron makapili og eskuylahan nga tukoran og edipisyo.
Matud pa ni Mariano nga gipili nila ang LES tungod sa mga opisyal ug miyembro sa Parents Teachers Community Association sa maong tulunghaan nga aktibo kaayo sa ilang katungdanan.
Tulo ka mga edipisyo ang itarok sa luna nga may gidak-ong 1.6 ektaryas sulod sa compound sa LES.
Sumala sa plano, mokabat sa 80 ka lawak klasehanan ang sulod sa maong mga edipisyo alang sa nanagtubo nga gidaghanon sa mga batang motungha sa maong eskuylahan. – BANAT NEWS