Mga minero nagtinigbasay

CEBU, Philippines - Pulos samdan ang duha ka trabahante sa minahan sa karbon nga gipanag-iya sa usa ka provincial board member dihang gitigbas ug giluba sila og unay sa kauban nilang mga minero didto sa barangay Balaas, lungsod sa Argao, sa miaging hapon.

Ang mga biktima mao sila si Ingracio Cuestas Flores, 20, nga taga barangay Bulak, lungsod sa Dalaguete, ug Jeorge Besin Rosiano, 25, pulos ulitawo, taga barangay Santikoy, lungsod sa Balamban, ug kaubang nagtrabaho sa minahan ni Bokal Wilfredo Cameniro.

Samtang ang mga suspetsado mao sila si Victoriano Lanticsi, 43, minyo, nga taga sitio Bayabas, barangay Cansuje lungsod sa Argao, ug Nelson Cuestas, hingkod, minyo, nga taga barangay Bulak, lungsod sa Dalaguete.

Si PO1 Eduardo Semilla sa Argao Police Station mibutyag sa Banat News nga ang mga suspek nga si Lanticsi ug Cuestas unang nagkaaway ug dihang miinit na pag-ayo ang tinubagay, si Cuestas mikuha sa iyang sundang.

Apan si Lanticsi kinsa nakabantay, midagan usab ngadto ilawom sa minahan ug mikuha usab sa iyang kutsilyo dayong gawas.

Gumikan sa iyang kalagot kang Cuestas, ang ig-agaw niining (Cuestas) kinsa nasugatan niya samtang paingon na siya sa paggawas sa minahan nga nagbitbit na sa iyang kutsilyo, maoy iyang giduslak sa tiyan.

Dihang nakita ni Cuestas nga maoy giluba ni Lanticsi ang iyang (Cuestas) ig-agaw nga si Flores, gitigbas usab dayon niya si Rosiano kinsa suod kaayong higala ni Lanticsi ug maayong pagkatabas sa walang bahin sa abaga niini.

Daling gihatud ang mga biktima sa Isidro Kintanar Memorial Hospital sa lungsod sa Argao, apan tungod sa katalandugon sa ilang kahimtang, gibalhin sila sa tambalanan sa dakbayan sa Sugbo.

Samtang ang suspek nga si Lanticsi boluntaryong mitahan dayon sa kapolisan uban ang iyang kutsilyo nga nagkadugo pa , apan si Cuestas nakasibat ug gipangita pa karon sa kapolisan.

Gihikay na sa kapolisan ang mga tukmang kaso nga ipasaka batok sa mga suspetsado.

Samtang si Bokal Cameniro, wala pa kakuhai og pamahayag kalabot sa maong hitabo. – BANAT NEWS