CEBU, Philippines - Mitahan niadtong milabay'ng gabii niadtong Lunes ngadto sa usa ka retiradong opisyal sa polis ang suspetsadong miunay sa paggulgol sa iyang kapuyo diha sa Panadtaran, lungsod sa San Fernando.
Ang suspetsado mao si Aquilles Bacot alyas “Benjie,” 27, lumad nga taga barangay Biasong, lungsod sa Balamban ang nagtingkagol karon sa San Fernando detention cell.
Kahinumduman nga si Bacot maoy gitumbok nga migulgol kang Maricel Aropo, 26, lumad nga taga Tugbongan Garcia Hernandez, Bohol.
Si SPO2 Sherwin Abellare kinsa maoy miimbestigar sa insidente mibutyag sa Banat News nga si Bacot dunay kasong murder sa Balamban diha sa City Prosecutor’s Office niadtong Nobiyembre 10, 2009 ug ang maong kaso wala pa maresolba.
Matud ni Abellare nga sa wala pa mahitabo ang insidente si Bacot ug Aropo naglalis sa pinansiyal nga problema, gikatahong unang milanit og kutsilyo ang babaye ug gidunggab si Bacot sa tuong kamot. Hinungdan nga gilayog kini sa suspek ug dihang nailog sa suspek ang kutsilyo gisumbalik niya kini og dunggab ngadto sa biktima, matud pa ni Abellare ang suspek miangkong mabuhi pa gyud unta ang biktima apan tungod kay wala siya’y ikabayad sa tambalanan iyaha nalang kining gitiwasan og gulgol.
Human sa hitabo si Bacot ang mideretso ngadto sa balay sa iyang higalang retiradong colonel nga si Benjamin Paclibar sa dakbayan sa Sugbo ug mao nay mi-turnover kaniya sa Presidential Anti Crime and Emergency Response (PACER). (BANATNEWS)