Bomb threat sa MCIA negatibo

CEBU, Philippines - Nakadawat og hulga sa pagpamomba ang Civil Aviation Authority of the Philippines kun CAAP-7 kagahapon sa buntag hinungdan Mactan Cebu International Airport naalarma.

 Matud pa ni CAAP-7 Regional Director Agnes Udang nga mga 10:00 kagahapon sa buntag nakadawat og hulgang dunay bomba diha sa MCIA ug sa pantalan sa Sugbu apan wala mohatag og saktong giya kun asa kini gibutang sumala pa sa gibutyag sa nakadawat sa tawag nga Personnel Officer nga si Juliet Baltar. Ang caller gikatahong usa ka lalaki nga wala mohatag sa iyang pangalan ug rason sa pagtanom niini og bomba sa tugpahanan.

 Gumikan niini si Udang dali nga mitaho niini ngadto sa mga sakop sa Police Center for Aviation Security kun PCAS-7 pinaagi sa ilang hepe nga si Sr. Supt. Joselito Salido. Ang Police Center for Aviation Service- 7 daling mitawag sa Philippine Air Force K9 Unit ug misusi sa palibot sa MCIA apan walay nakit-ang bomba.

 Apan matud pa ni Udang ug Salido ang mga butang nga sama sa pagpanghulga sa pagpamomba dili angayang ibali wala lamang sa mga awtoridad ug kinahanglan nga seryusohon kini sa paghiling alang sa kaluwasan sa mga pasahero sa maong tugpahanan.

 Matud pa ni Udang matag “peak seasons” o panahon sa daghang pasahero adunay mga tawo nga manghulga sa seguridad sa mga pasahero sa mga tugpahanan diin kasagaran niini nga pasahero usab nga wala mahatagi ug kahigayonan nga makasakay ug wala makakuha og ticket. (BANATNEWS)