CEBU, Philippines - Nangangkon si Go Cebu party mayoralty candidate Georgia Osmeña nga panahon na niya karong mosunod sa mga tunob sa iyang amahang si Senador Sergio “Serging” Osmeña nga palambuon ang dakbayan sa Sugbu.
Si Georgia nga giimbitar sa round table discussion sa The Freeman kagahapon dayag kaayong malipayon sa iyang gihimong pagsulod sa politika bisan walay suporta gikan sa igsuong si Mayor Tomas Osmeña.
Matud pa niini naa na sa dugo sa usa ka Osmeña ang pag-alagad ug susama sa iyang amahan, giangkon niya nga dili siya makadaog kung ang maguwang nga si Tomas maoy iyang ikaatbang.
Sumala pa niini nga walay bisan usa ka kandidato karon sa pagkamayor sa dakbayan, bisan na si Michael Rama nga giendorso sa iyang igsuon sa Bando Osmeña Pundok Kauswagan ang makatupong kaniya.
Karong wala na modagan si Tomas sa dakbayan nagtuo si Georgia nga hinog na siya alang niini ug miangkong dako ang iyang tsansang modaog sanglit sagad sa mga kapitang kaalyado sa BOPK nahadlok sa iyang igsuon apan walay bilib kang Rama nga mahimong mayor.
“I have no strong opponent, only Tommy’s BOPK machinery,” matud pang Georgia kinsa walay likay-likay sa pagtubag sa tanang pangutana bisan pa sa personal niyang kinabuhi.
Kun palaron, buot ni Georgia nga ibalhin ang Carbon market layo sa City Hall ug sa Malacañang sa Sugbu ngadto sa mas moderno ug limpyong merkado nga mahimong kasuruyan ug dugokon bisan sa mga turista. Dili usab siya pabor sa Light Rail Transit sanglit base sa iyang kasinatian sa Manila, kadaghanan sa mga dagko ug gagmay'ng kadalanan nga giagian sa LRT nangasirado tungod kay wala na mangaging sakyanan.
Buot usab ni Georgia pagtukod og tagsa ka city hospitals sa south ug north district, pagtukod og kabutangan sa street children, paghatag og kapuy-an sa walay balay, pagpabalhin sa dumpsite, pagpadayon sa maayong nahimo sa maguwang, pag-atiman sa kadalanan ug pagpalambo sa turismo. Mitambag hinuon siya sa kasamtangang mga opisyal nga kung walay pagkasinabtanay adto nila kini sulbaron sa hilom nga paagi ug dili magpasikatay sa mga pamantalaan. ( Edwin Ian Melecio) (BANATNEWS)