CCPO, CPPO hightened alert na

CEBU, Philippines - Gibutang sa hightened alert status ang kapolisan sa probinsya sa Sugbu sugod kagahapong adlawa nunot sa paghinumdom sa Semana Santa. Si Sr. Supt Erson Digal, pangulo sa kapolisan sa lalawigan nagkanayon nga dili angayang mokompiyansa ug doblehon pa gyud ang pagbantay sa gagmay ug dagkong pantalan ilabina diha sa Hagnaya lungsod sa San Remegio.

Matud ni Digal dunay usa ka team sa Special Reaction Unit (SRU) ang gipabantay niya sa Hagnaya Wharf aron maoy mo-double check sa mga pasahero nga mosakay sa ro-ro ug fastcraft paingon sa Bantayan Island karung Semana Santa.

Gawas niini, duna say gibutang nga bomb sniffing dogs diha sa Hagnaya nga maoy mosimhot sa mga bagahe sa pasahero ingon man sa South Bus Terminal. Nagtuo si Digal nga sugod karung adlawa ug ugma (Miyerkules) modagsang na og maayo ang mga lokal ug langyaw’ng turista nga mobisita diha sa Bantayan Island.

Samtang dunay duha ka sakop sa Theft and Robbery Section (TRS) nga ipadala ngadto sa Bantayan Island sumala pa ni Cebu City Police Office director Sr. Supt. Patrocinio Comendador.

Ang pagpadala sa duha giaprubahan usab ni Police Regional Office -7 director Lani-O Nerez nga makalarga karung Huwebes subay sa resolusyon sa Sangguniang Bayan nga nag-hangyo sa CCPO pagpadala og TRS operatives.

Ang lokal nga opisyales sa lungsod nagdudang modagsang usab ang mga tulisan ug hilabtanon tungod sa mga turistang mangabot diha sa ilang lugar. (BANATNEWS)