Kapitolyo mihangyo'g 'ceasefire' una sa politika karong semanaha
CEBU, Philippines - Ang kagamhanan sa lalawigan sa Sugbu miawhag ngadto sa kaatbang sa politika nga mopatuman og "cease fire" sa mga isyu batok sa buhatan ni Gov. Gwendolyn Garcia agi og pagyukbo sa paghinumdum sa Semana Santa.
Sumala pa ni Capitol Consultant on Information Atty. Rory Jon Sepulveda sa interview sa DyRF nga isip mga Kristiyano angayang hunongon una ang panagbingkil sa politika karong semanaha.
“Lenten season man ta kita karon, angayan natong mga Katoliko ug mga Kristiyano nga magpalandong sa kinabuhi sa mahal nga Kristo,” sigon pa ni Sepulveda.
Samtang gitumbok ni Sepulveda nga ang One Cebu Party, nga usa ka local provincial party, dili kaalyado sa Lakas-Kampi-CMD ug dili usab kini partido sa administrasyon ni Presidente Gloria Arroyo.
Apan kini miingon nga nahitabo lamang nga ang One Cebu Party nga gipangulohan sa gobernador misuporta sa kandidatura sa administrasyon nga si Lakas-Kampi-CMD standard bearer kanhi Defense Sec. Gilbert Gibo Teodoro.
Iyang giklaro nga si 6th district Kong. Nerissa Soon-Ruiz mi-resign sa Lakas-Kampi-CMD ug mitapon na sa pagsuporta kang Senador Manny Villar sa Nationalista Party, adunay dakong tulubagon ngadto sa administration party.
Hinuon iyang gitataw nga ang One Cebu mohimo usab og aksyon sa pamahayag ni Ruiz nga magpabilin siyang mopaluyo sa mga kandidatura sa One Cebu party. (Chester Abadilla)
- Latest
- Trending
