CEBU, Philippines - Hugot ang pagtuo ni Francisco ‘Ashley’ Acedillo, usa sa mga mikandidato sa pagka-kongresista sa north district sa dakbayan sa Sugbo nga pinaagi sa iyang pagpangampanya sa matag panimalay, makabaton siya og daghang boto sa katawhan sa amihanang distrito karong piniliay sa Mayo 10 ning tuiga.
Miingon si Acedillo nga giganahan kaayo siya niining iyang paagi ug nalipay siya nga nahimamat ang matag pamilya nga iyang giduaw.
Nasabtan usab niya nga ang politika maghatag gyud og kakugi sa usa ka tawong politiko kay kun wala pa siya mokandidato pagka-kongresista dili siya makaduaw sa matag panimalay sa taga north district.
Nasinatian usab niya nga mas maayo ang pagbisita sa matag balay ug paghimamat sa mga nagpuyo niini kay sa mohimo siya og pulong-pulong nga daghan siyang dili mahimamat pag-ayo.
Hinuon matud niya nga kundili niya malukop og suroy ang mga kabalayan sa amihanang distrito ning dakbayan, gipaniguro niya nga moabot gyud og himabaw sa katibuk-ang panimalay sa maong lugar ang iyang mabisitahan hangtod sa adlaw nga patak-opan na sa Comelec ang pangampanya.
Naglaum usab siya nga makakuha gyud siya og boto sa mga katawhan sa norte bisan kun walay mga kapitan sa barangay nga nagpaluyo sa iyang kandidatura.
Ang mga kaatbang ni Acedillo sa maong distrito mao sila si Kapitan Mary Ann delos Santos sa barangay Lahug ug ang anak ni Kongresista Raul del Mar nga nailhan sa ngalang Cutie del Mar. - Lesley Caminade (BANAT NEWS)