Giluba'g buak nga botelya kritikal

CEBU, Philippines - Usa ka tawo nga giluba og buak nga botelya sa iyang silingan sa sitio Taboc, barangay Guinacot, siyudad sa Danao sa miaging gabii, anaa karon sa talandugong kahimtang.

Ang biktima mao si Florante Marcos Bernardo, 37, molupyo sa maong lugar, samtang ang suspetsado mao si Lito Tampus nga iyang silingan.

Nasayran gikan sa kapolisan nga nagkalalis ang biktima ug ang suspetsado bahin sa personal nga butang apan gumikan kay daan na silang nagkabangi, dali kaayong misilaob ug misangpot sa kainit ang maong panaglalis.

Ang suspetsado kinsa nahutdan na og katarungan, ug gisanapan sa hilabihang kapungot nakapunit og basiyo sa ilimnong makahubog ug human kini ipuspos sa yuta ug nabuak, iyang gihansak ngadto sa lawas sa biktima.

Samdan sa dughan ug sa hawak ang biktima ug gidali kini paghatod ngadto sa tambalanan sa dakbayan sa Sugbo tungod sa katalandugon sa kahimtang niini.

Sa pagkakaron gipangita pa sa kapolisan ang suspetsado kinsa nakasibat human sa maong hitabo. - Lesley Caminade (BANAT NEWS)