Hao shiao' sa customs giaksiyonan na

CEBU, Philippines - Si Cebu Customs District Collector Ronnie Silvestre miaksiyon na batok sa mga “hao shiao” o “non organic personnel” sa maong buhatan nga gireklamo sa mga brokers ngadto sa Ombudsman Visayas.

Kini human madawat ni Silvestre ang kopya sa reklamo sa mga customs broker nga gipadala sa buhatan sa Ombudsman Visayas.

Gipatawag ang atensiyon sa gireklamong hao shiao sa duha ka hepe sa departamento nga nalambigit sa maong reklamo.

Base sa maong reklamo sa mga broker pinitsahan niadtong Pebrero 26, 2010 ngadto sa Ombudsman Visayas nagtug-an nga dunay mga hao shiao sa maong ahensiya nga naghupot og mga katungdanan nga alang lamang sa mga organic nga empleyado sa customs apan kini gipasagdan lamang sa mga nagdumala sa maong mga division sa maong buhatan.

Gumikan niini, nakita sa mga reklamante nga sukwahi kini sa programa sa Bureau of Customs nga “Trade Facilitation” gumikan kay malangay lang gihapon ang transaksiyon gumikan sa mga hao shiao. Sumala pa nga nakalapas kini sa Akta Republika 9485 kon Anti Red Tape Act of 2007.

Ang maong reklamo gipaabot ngadto ni Deputy Ombudsman for the Visayas Pelagio Apostol, BOC Commission Napoleon “Boy” Morales ug Silvestre.

Gumikan sa maong reklamo, ang mga hao shiao gipanangtang sa ilang mga katungdanan ug gidid-an sa paghupot og mga mahinungdanong mga transaksiyon ngadto sa publiko ilabi na sa mga brokers.

Pipila ka mga opisyal mihimakak sa reklamo nga adunay gisaligang mga hao shiao sa ilang mga buhatan. Mipasabot sila sa Banat News nga dili ikalimod nga kulang og tawo ang Bureau of Customs hinungdan nga mikuha sila sa serbisyo sa mga dili organic nga mga kawani. - Bong Soriano (BANAT NEWS)