Admin sa Talisay grabe pamolitika

CEBU, Philippines - Ang grupo sa oposisyon sa dakbayan sa Talisay misaway sa administrasyon nga grabe ang pamolitika ug ang mayor padayong midupa sa mga kalapasan sa iyang sinagop.

Si kanhi Bokal Raul Bacaltos kinsa midagan pagka-mayor sa Talisay atbang kang incumbent Mayor Socrates Fernandez atol sa gipahigayong press conference sa ilang grupo diha sa Chowking sa Gaisano Fiesta Mall niadtong Sabado sa buntag mikuwestiyon sa mayor kabahin sa pagdumala niini sa Talisay.

Matud ni Bacaltos nga makita sa tanan nga dili maayong pagkadumala sa mayor ang iyang anak ug sige lang kini og dupa sa kalapasan niini labaw na ang 250 mil ka mga Talisaynon.

“Kung wala man gani siya ka-manage sa iyang anak, how much sa iyang pag-manage sa 250,000 ka mga lumolupyo sa dakbayan,” ni Bacaltos pa.

Usa sa gisentro ni Bacaltos sa iyang plataporma ang kabahin sa higpit nga implementasyon sa kahapsay ug kalinaw sa siyudad.

Si kanhi Bise Mayor Aberdovey Belleza kinsa mikandidato usab karon sa pagka-bise mayor misaway sa administrasyon nga sobra ang pamolitika ug matud usab niini nga ang mga baba sa kawani sa city hall gipangtak-om tungod kay mahadlok nga mopadayag sa tinud-anay nilang gustong suportahan.

Matud ni Belleza nga mahadlok ang ubang kawani nga taktakon sa ilang trabaho kun mabatian nga mipadayag sa tinuod nilang suportahan.

Kahinumduman nga ang mga ‘quota’ ni Belleza gipangtaktak sa mga trabaho niini tungod kay giingong ang kanhi bise mayor wala na sa serbisyo diha sa city hall.

Apan matud ni Belleza nga sa dihang milingkod siya isip bise mayor sa siyudad niadtong tuig 2004-2007 wala siya’y bisan usab sa mga quota sa iyang kaatbang nga gipangtaktak sa trabaho gani uban sa maong kawani diha pa niya gibutang sa iyang buhatan.

Matud usab niini nga makita karon nga ang iyang asawang si Konsehal Shirley Belleza gihinay-hinayan na sa pagtangtang sa grupo tungod sa pagduda nga mibali na gyud kini ngadto sa oposisyon.

Gitataw sa kanhi bise mayor nga siya lang ang gikampanyahan sa iyang asawa apan gibutyag usab niya nga padayon kining gihangyo sa oposisyon nga makig-alyado na gyud ngadto kanila. - Brenda D. Batuto (BANAT NEWS)