Reklamante nga Joavan may kuyog mga polis giawhag

CEBU, Philippines - Ang hepe sa Talisay City Police Station nga si Supt. Henry Biñas miawhag sa nagpakatap sa taho nga dunay mga polis nga nagsunod-sunod kang Joavan samtang nagpapilit kini og posters sa iyang amahan nga si Mayor Socrates Fernandez diha sa barangay Poblacion niadtong Huwebes sa gabii, sa pagpamatuod sa iyang nahibaw-an.

Gihimakak sa hepe nga duna siya’y mga polis nga gipadala aron magsunod-sunod kang Joavan ug gani matud usab niya nga bisan pa og ang mayor mohangyo ngadto kaniya nga magpadala og police escort atol sa pagpangampanya niini iya kining balibaran tungod kay gidili kini sa balaod.

Giawhag ni Biñas ang nagpakatap sa maong taho nga mopadala og suwat ngadto kaniya o ba kaha moanha sa iyang buhatan ug itug-an ang mga ngalan sa mga polis nga giingong nagkuyog-kuyog kang Joavan.

Ang hepe mibahad nga diha-diha dayon ipalabay niya gawas sa rehiyon 7 ang mga polis nga mapamatud-an nga nagsunod-sunod kang Joavan.

“Kung dili man dautan ang imong tuyo, kung tinud-anay kang nagpakabana manghinaot ko nga moanha ka sa akong buhatan o ba kaha mopadala og suwat ug itug-an ang mga ngalan sa mga polis nga giingong nagsunod-sunod kang Joavan”, ni Biñas pa.

Ang hepe mipadayag sa iyang kasagmuyo human makabati sa nahisgutang report ug nagkanayon kini nga “kutob sa among mahimo gibuhat namo ang tanan alang sa kaayohan sa mga Talisaynon”.

 Kahinumduman nga niining bag-o lang si Biñas miduso og manifesto ngadto sa korte alang sa compulsory rehabilitation kang Joavan.

Si Binas midugang nga ang tanan niyang gibuhat mao lang ang pagtuman sa iyang trabaho. (Brenda D. Batuto)    (BANATNEWS)