CEBU, Philippines - Gumikan sa kakusog karon sa industriya sa paguwapa, may mga kompaniya sa cosmetics dinhi sa Sugbo nga naglaraw na nga mopalapad sa linya sa ilang produktong sabon nga paguwapa sa tibuok nasud nga maglakip sa mga dapit sa Luzon niining tuiga.
Matud pa ni Leonora B. Salvane, ang sales manager sa GT Cosmetics Manufacturing nga ang ilang mga produktong sabon nga isabwag sa nagkalainlaing outlet sa nasud niining tungora, pulos na bag-o nga lahi na sa naandan.
Ang paghimong moderno sa maong mga produkto maglakip sa timplada sa mga materyales niini, hitsura sa putos ug matang ug paagi sa pagputos nga labing madanihon tan-awon.
Si Salvane kinsa nagsugod sa pagnegosyo og cosmetics niadtong 1994, nalipay kaayo dihang ang gidugang niyang linya sa negosyo nga mao ang sabon nga paguwapa, maoy gihingusgan karon ug gihimalitan pag-ayo sa mga kababayen-an.
Kini sa dihang namatud-an sa kadaghanan nga sa paggamit nila sa maong sabon miguwapa sila og maayo unya mihamis ang ilang kotes nga nakahatag og umento sa ilang personalidad.
Miingon si Salvane nga bisan og nabalaka siya sa planong pag-usab sa hitsura ug paagi sa pag-impake sa iyang mga sabon, apan milaum siya nga ang iyang mga customer labi pang malipay niini.
Usa niini mao ang iyang Carrot Soap nga itom na og karton, nga matud niya bisan layo pa, mailhan na sa customer nga kini produkto sa GT.
Midugang siya nga usa kini sa estratihiya nga iyang gisagop aron labing motaas ang kalidad sa iyang produkto.
Midugang siya nga sa produkto nilang sabon , ang GT makahimo og 2,000 ka bareta matag adlaw, diin napulo ka tawo ang motrabaho niini diha sa pabrika.
Samtang padak-an ang produksyon niini matag adlaw, kini nagkahulogan nga padaghanan usab ang mga trabahante sa pabrika, dugangan ang mga tindera ug mga promo girl ug makatabang kaayo og dako sa kagamhanan sa paghatag og trabahao sa katawhan ug pagpadaghan sa buhis sa panudlanan niini.(Wen Celen) (BANATNEWS)