Rali sa mga kandidato malinawon

CEBU, Philippines - Gihulagway sa kapolisan sa dakbayan sa Lapulapu nga malinawon ang unang adlaw sa local nga pangampanya sa upat ka kandidato pagka- mayor ug mga kaubanan niini sa partido sa maong dakbayan.

 Kini base sa pagmonitor sa kapolisan sa tanang mga kalihukan ug nagkadaiyang gimik sa mga kandidato sa matag partido atol sa unang adlaw sa ilang pangampanya.

 Ang partido Lakas Kampi-CMD nga gipangulohan ni Mayor Arturo Radaza kinsa magpapili sa pagka- kongresista sa maong dakbayan, uban kang Barangay Kapitan Paz Radaza kinsa magpapili sa pagka-mayor, Marcial Ycong sa pagka-bise mayor, ug mga konsehales sa maong partido   mipahigayon og motorkada gikan sa simbahan sa Birhen sa Regla ngadto na sa palibot sa centro sa dakbayan sa Lapulapu uban sa kaliboan niining suporter.

 Samtang ang mga kandidato sa Nationalist People’s Coalition (NPC) nga gipangulohan ni Junard “Ahong” Chan sa pagka- mayor, Lito Ruiz, sa pagka- Kongresista ug manlalaban Rico Amores sa pagka-bise mayor ug mga konsehales, didto usab magpundok sa Poorclaire Monastery nga nangaliya sa ilang kadaugan.

 Unya didto sila sa barangay Marigondon mulusad sa ilang kampanya nga gitambongan usab sa kaliboan ka tawo.

 Samtang ang kandidato usab sa Liberal Party nga si Efrain Pelaez sa pagka-mayor ug manlalaban Eugene Espidido sa pagka-kongresista unang mikuyog sa mga kandidato sa LP sa Probinsiya sa Sugbo nga gipangulohan ni manlalaban Hilario “Jun” Davide nga didto magrali sa Mandaue reclamation area ug gitambongan usab sa kaliboan nila ka mga dumadapig.

 Samtang si Isabilito “Belong” Darnayla uban sa iyang mga kandidato mihimo usab og nilaing pakighimamat sa mga molupyo sa Barangay Basak, Lapulapu.

 Sa unang adlaw sa pangampanya sa maong mga kandidato walay nadawat ang kapolisan nga mga alarma nga may labot sa mga politikanhong kalihokan sa dakbayan.

 Hinuon matud pa ni Lapulapu City Police Office Director P/SSupt. Mariano Natu-el Jr. daan na niyang gimanduan ang iyang mga sakop sa paghatag og siguridad sa tanang partido nga nagpapili sa dakbayan sa Lapulapu nga walay pagdapig sa usa’g-usa niini.    (BANATNEWS)