CEBU, Philippines - Ang opisyal sa Department of Education sa dakbayan sa Talisay mihagit ngadto sa mga ginikanan kinsa dunay reklamo kabahin sa dili makatarunganong balayranan ug amotan sa mga pampublikong tunghaan nga moduso og pormal nga reklamo ngadto sa buhatan sa division superintendent aron mahatagan kini og aksiyon.
“I’d like to challenge them to come to the open and tell to the superintendent their complaints”, matud ni Ofelia Hermosa, assistant DepEd-Talisay City Division Superintendent. Si Hermosa midayag sa mao niyang hagit human ang ubang mga ginikanan sa Talisay City Central School ang mireklamo kabahin sa “press con” fees nga gibayaran sa mga estudyante sa milabay’ng mga buwan.
Usa ka amahan sa pupil sa grade three kinsa nagdumili sa pagpahingan tungod sa kabalaka nga kontrahan unya ang iyang anak sa maestra ang mitug-an ngadto sa The Freeman igsuong publication sa Banat News nga ang iyang anak mangayo og P50 ngadto kaniya matag buwan sa milabay’ng tuig ug giingong bayad kini sa nahisgutang balayranan.
Ang giingong “press con” niadto magbayad sila niini lat-ang og usa ka buwan apan ulahi sa milabay’ng tuig matag buwan na mangayo ang iyang anak og bayad.
Ang nahisgutang amahan kinsa usa lang ka panday ug mokita lang og P250 matag adlaw nga maoy kuhaan sa ilang inadlaw nga panginahanglanon ug sa iyang duha ka anak mipadayag nga bug-at kaayo sa iyang bulsa ang maong balayronon matag buwan.
“Wa sad na nila gipasabot kung unsa nang “press con”, abi nako og magpa-presscon na sila ninyo, unya ipanghatag na nila ang nakolekta sa taga media”, matud pa sa maong amahan.
Hangtud sa pagsuwat niining balita ang Talisay Central School wala magpatawag og presscon o press conference ngadto sa mga sakop sa media.
Ang maong amahan mipasangil usab nga sukad nga wala sila makabayad sa binuwan nga press con fee sa milabay’ng buwan ang maestra misugod usab og kolekta gikan sa mga bawon sa pupils hangtud kini moabot ngadto sa P50.
Si Hermosa mipasabot nga sa iyang nahibaw-an ang maong press con fee ang giingong registration fee sa mga pupils kinsa moapil sa mga interschool writing contest. (Brenda D. Batuto ug Liv G. Campo sa The Freeman) (BANATNEWS)