LP mihagit ni Villar sa debati

CEBU, Philippines - Ang mga kandidato pagka-senador sa Liberal Party (LP) kagahapon mihagit kang Senador Manuel Villar ang kandidato sa pagka-Presidente sa Nacionalitsa Party (NP) nga makigharong sa debati tali kang LP standard bearer Benigno “Noynoy” Aquino III.

Kini sa dihang nasayran nila nga mibahag ang ikog ni Villar ug miatras sa gitakdang debati pinaagi sa usa ka public affairs program sa ABS-CBN kinsa maoy mitupo sa duha alang sa usa ka one-on-one nga   public debate.

Busa giawhag siya ni Representante Risa Hontiveros sa Party-list kinsa mikandidato pagka-senador sa LP nga dili magpahipi sa daghan niyang kuwarta ug mga political ads sa telebisyon, radyo ug pamantalaan.

Matud pa ni Hontiveros nga kun may katakos sa Villar nga manguna sa nasud, kinahanglang makigdebati siya kang Noynoy aron makita ang katag.

Si Dr. Martin Bautista, usa usab sa mga kandidato pagka-senador sa LP mipasabot sa iyang kapungot batok ni Villar ug mihagit niini nga kinahanglang ipagawas niya ang iyang tingog pinaagi sa pakigdebati kang Noynoy aron masuta kun unsay abilidad ug katakus niini sa plano niyang mahimong presidente sa nasud.

Samtang si manlalaban Alex Lacson kandidato gihapon sa pagka-senador sa LP nagkanayon nga kining gipakita karon nga katalawan ni Villar,mao usab kini ang iyang ipakita sa nasud kung siya mapiling presidente.

Apan matud pa niya nga ang tinuod, natalawan si Villar kay basin masayran sa katawhan ang kamatuoran bahin sa mga isyung naglambigit kaniya sa anomalosong mga transaksyon. - Lesley Caminade