Garcia midayeg sa kadagkoan sa ASSA

CEBU, Philippines - Gidayeg ni Gobernador Gwendolyn Garcia ang ASEAN Social Security Association (ASSA) sa pagtigom sa iyang tanang sakop ug mipili sa Sugbo nga maoy dapit sa maong panagtagbo aron hisgutan ang nagkalain-laing butang may labot sa iyang serbisyo sa katawhan sa rehiyon.

Isip mamumulong sa pagbukas sa tulo ka adlaw nga tigom, si Garcia mipasabot sa kamahinungdanon sa papel kon kaakohan sa ASSA sa pagpalig-on sa seguridad sa panarbaho sa mga sektor sa mga empleyado sa mga nasud nga sakop sa Association of Southeast Asian Nations (ASEAN)

Kini tungod kay sa ilang tigom gihisgutan sa mga manager sa mga ahensya sa social security sa rehiyon bahin sa maayong proteksyon sa mga nanarbaho sa nagkalainlaing sektor sa industriya sa rehiyon sa Asia.

Gumikan sa kalig-on sa maong kahugpongan, dako kaayo og paglaum ang tanan nga makabaton og hayag nga kaugmaon alang sa seguridad sa ilang pagpuyo ug panginabuhi.

Sa samang higayon nasil-ingan usab sa mga delegado sa ASSA gikan sa mga nasud nga sakop sa ASEAN ang bag-ong eCard sa Government Service Insurance System (GSIS) nga moderno kaayo.

Gani sa dili madugay hingpiton na ang desinyo nga ipahaom ug isakar sa United Multi-Purpose ID (UMID) System diin magamit na sa mga transaction alang sa uban pang ahensya sa seguridad sa gobyerno sama sa Social Security System (SSS), Philippine Health Insurance System (Philhealth) ug Home Development Mutual Fund (Pag-ibig). - Wen Celen (BANAT NEWS)