Mga politiko sugod na og gimik panguyab sa voters

CEBU, Philippines - Nagkadaiyang gimik dayon ang gilusad sa mga nagkadaiyang lokal nga mga partido ug kandidato aron panguyaban ang botos sa ilang mga dapit sa pagsugod kagahapon sa local campaign period, apan usa ra gyuy pareho nilang unang gihimo kagahapon, kini mao ang pagtambong og Santos nga Misa nga daw nagpalaban sa Ginoo aron sila katuohan sa mga botante.

Kini samtang ang kapolisan pabiling higpit nga nag-monitor sa tanang campaign activities sa mga lokal nga kandidato pagsigurong walay kasamok nga mahitabo sanglit mas gipanglantawang init ang mga supporters pagsuporta sa ilang lokal nga kandidato kumparar sa mga nasyunal nga kandidato.

Kagahapon, sa dakbayan sa Sugbu ang nag-unang oposisyon nga Kugi Uswag Sugbo (KUSUG) mihangyo sa katawhan nga pilion ang kandidatong dili mag-agad sa tingog sa usa ra ka tawo, dili magpadani sa gipanghatag sa mga politiko aron madani pagbotar kanila.

Matud pa ni Lahug barangay kapitan Mary Ann Delos Santos kinsa modagan pagka-kongresista sa North District ug kanhi mayor Alvin Garcia nga kandidato sa pagkamayor mipahibalo sa publiko nga ang gipang-apod sa mga kandidato karon kwarta gihapon sa mga molupyo sa syudad.

Sa laing bahin, si Jonathan ‘Atan’ Guardo nga maoy makaatbang ni Mayor Tomas Osmeña pagka-kongresista sa south district misaway niini nga migamit sa kwarta sa publiko aron makakuha og botos pinaagi sa pagpanghatag og mga financial assistance sa señor citizens, mga bakul, mga kapilya, allowance sa mga huwes ug uban pa.

Mao usab kini ang nakit-ang kahiwian ni north district congressional candidate Ashley Acedillo nga miingong makaduda ang tayming sa pagpanghatag niining mga financial assistances nga angayang kaniadto pa man unta angayang gihimo.

Kun ang pagbukas sa oposisyon may labtik ngadto sa mga kaatbang, ang Bando Osmeña Pundok Kauswagan unang nangampanya sa dul-an usa ka libong kawani sa Cebu City Hall kagahapon human sa Santos nga Misa sa Cebu Metropolitan Cathedral.

Si Msgr. Boy Alesna kinsa maoy miselebrar sa misa mipahimangno sa mga nangambisyong makalingkod og katungdanan pinaagi sa piniliay nga unahon ang pagserbisyo ngadto sa katawhan ug dili ang kaugalingong interes.

Ang BOPK giduyugan sa gibana-banang usa ka libong supporters, kabanay ug mga kandidatong nagsuot og kolor yellow , blue ug duna say itom nagmartsa gikan sa katedral padulong sa city hall.

Si Osmeña dihang gipangayoan og reaksyon kabahin sa pagsuporta sa Kusug kang Nationalista Party standard bearer Senador Manny Villar, siya nagkanayon nga walay makuhang kaayohan gikan sa lokal nga partido ang mga national candidates tungod kay mopatigbabaw ra gyud niini ang pagduso sa ilang mga kaugalingon tungod usab sa personal nga interes.

Nagtuo ang mayor nga ang mga Sugbuanon makapadaog og kandidato pinaagi sa tinuuray nga kun unsay naa sa kasing-kasing niini.

Samtang gipasidan-an ni Osmeña ang mga botante nga kun dunay mamalit og botos, kinahanglang dawaton kini apan kinahanglang botaran nila si kinsa ang naa sa ilang kasing-kasing ug angayang kandidato.

Kagahapon gisugdan usab sa One Cebu Party gipangulohan ni gobernador Gwendolyn Garcia ang ilang lokal nga pangampanya nga nagsugod sa Dumanjug ug gisunod dayon ang caravan palibot sa tibuok 2nd district.

Unang gibisita sa gobernadora mao ang munisipyo sa Dumanjug diin ang maong lugar maoy iyang yutang natawhan ug iyahang gituboy ang iyang igsoon nga si Winston Garcia sa pagka-mayor ug sa ubang mga kandidato.

Sunod ang Ronda, Moalboal, Badian, Alegria nga diin duha ang gituboy sa pagka-mayor nga sila si Emilita Guisadio ang asawa ni Mayor Guisadio ug Verna Magallon asawa ni Bise Mayor Gilberto Magallon.

Gisunod ang Malabuyoc, Ginatilan, Samboan, Santander, Oslob, Boljoon, Alcoy, Dalaguete, Alcantara ug sa Argao.

Samtang anha usab nanukad sa dakbayan sa Mandaue ang higpit nga kaatbang sa One Cebu nga mao ang Liberal Party ni gubernatorial candidate Hilario Davide III ug iyang runningmate nga si Bise Gob. Gregorio Sanchez ug uban pa.

Si Davide mipahibalo sa media nga nag-una nilang hisgutan sa kampanya mao ang mga dagkong isyu batok sa iyang kaatbang sama sa Balili property, ug ang Cebu International Convention Center (CICC) nga gigastuhan og minilyon sa Kapitolyo.

Apan mipasalig si Davide nga di sila moatake “below the belt.” Wala diha sa opening salvo ang bantogang amahan ni Davide nga si kanhi Supreme Court Justice Hilario Davide Jr. sanglit wala pa kini makaabot gikan sa gawas sa nasud, apan si Sanchez miingon nga dako kaayo og tabang sa ilang partido ang pag-abag kanila sa amahan sa batan-ong Davide.  - Lesley Caminade, Rey Pasaporte, Romeo Limpangog, Darrel Carumba ug Rene Boromeo sa The Freeman (BANAT NEWS)