Mga Mayor sa sugbo mobarug ni Gibo

CEBU, Philippines - Samtang gipaneguro ni Kongresista Eduardo Gullas ang kadaogan ni Sen. Manny Villar karong Mayo 2010 nga eleksiyon ug dungan kagahapon sa pagsugod sa local campaign, mga mayor sa lalawigan sa Sugbo nangisog ug miinsister nga si kanhi Defense Sec. Gilbert “Gibo” Teodoro ang hatagan og landslide victory sa mga mayor sa siyudad sa Sugbo.

Kini ilabi na nga si Gob. Gwendolyn Garcia mibarog gyud alang kang Teodoro ug misalikway sa mga intriga nga iyang biyaan ang kanhi kalihim sa depensa aron adto mopabor kang Villar.

Si Mayor Raymond Calderon sa lungsod sa Samboan nagkanayon sa pamahayag gikan sa Lakas-Kampi-CMD nga nadawat sa Banat News nga mayoriya gihapon sa mga mayor ang nagsuporta ni Teodoro.

“Majority of the mayors (in Cebu province) are with Gibo and Gov. Gwen (dolyn) Garcia,” sumala pa ni Calderon.

Ang pamahayag ni Calderon natayming sa pagsugod sa local campaign kagahapon, diin si Teodoro gikatakdang motambong sa rally sa lungsod sa Argao kagabii. Si Calderon ug ubang mga mayor mitambong usab sa rally nga gitambongan ni Teodoro.

Uban ni Calderon nga nagsuporta sa standard bearer sa Lakas-Kampi-CMD mao silang Mayor Arlene Zambo sa dakbayan sa Toledo ug Mayor Sun Shimura sa Daanbantayan.

Si Calderon nagkanayon nga ang mga mayor nagtuo nga si Teodoro maoy nakita nilang mahimong “best president” sa tanang presidentiable karon. “He is best prepared to be the next president.”

Ang presidente sa Lakas-Kampi-CMD nga si Saranggani Gob. Miguel Rene Dominguez nagkanayon nga nagka-estorya na sila ni Garcia ug mipasalig ang naulahi nga ang One Cebu party “intact” alang kang Teodoro.

“I believe in Gibo. For me he is a fresh face in politics and I appreciate his convictions. We’ll do our best. We will work hard for him in our city,” si Zambo sa Toledo nagkanayon.

Si Shimura sa iyang bahin nagkanayon nga dili gyud siya motalikod ni Teodoro ug ang Daanbantayan mohatag gyud og siyento porsiyentong suporta kaniya kinsa usa ka Harvard-trained nga abogado ug bar topnotcher niadtong 1989.

“He is the most qualified among all the presidential candidates,” matud ni Shimura.

Matud pa ni Dominguez nga kun ingon niini ang suporta sa mga mayor sa Sugbo, maseguro ang kadaogan sa standard bearer sa Lakas-Kampi-CMD.

Kahinumduman, 51 ka mga gobernador lukop nasud, apil na si Garcia, ang mipirma og manifesto of support alang kang Teodoro human nila ipaagi sa makuting pagtuon ang track record, qualifications ug platform of government ni Teodoro.

Si Dominguez nagkanayon nga sama sa mga gobernador sa nasud, ang mga mayor sa lalawigan sa Sugbo, pinaagi ni Garcia, nagtinguha nga mohatag og “victory” kang Teodoro sa Sugbo karong Mayo 10.  - Edwin Ian Melecio (BANAT NEWS)