80-anyos napaig

CEBU, Philippines - Patay ang usa ka 80-anyos nga babaye human masunog ang iyang balay sa sitio Kapalwahan, barangay Bojo, lungsod sa Aloguinsan sa hapon sa milabay’ng adlaw.

Ang biktima nailhan nga si Loncia Dimol, 80, molupyo sa maong dapit ug nag-inusarang nagpuyo sa maong panimalay tungod kay sa syudad sa Sugbu naman nagpuyo ang mga anak niini.

Gikatahong buhi pang milayat sa bintana ang biktima aron paglikay sa kalayo apan nagdilaab na ang ulo ug lawas niini ug wala na makaabot pang buhi sa tambalanan gumikan sa grabeng kadaot nga naangkon sa tibuok lawas.

Matud pa ni FO1 Leroy Quisido, nagluto ang biktima nianang hapon sa sala nga gihimo niyang abuhan human maguba ang iyang lutoanan sa gawas, nagduda ang kabomberuhan nga dunay nagbagang kahoy nga napasagdan ug midukot sa ubang parte sa balay nga nakaingon sa sunog.Ang silingan ug paryente sa biktima nga si Armando Caballero, mitug-an nga dako na ang sunog dihang ilang nabatyagan nga nanggawas na sa bintana ang kalayo, ang ilang balay nahimutang 100 ngadto sa 200 metros gikan sa balay sa biktima.

Si Caballero ug mga silingan misuway pa og tabang pagpawong sa kalayo samtang nakadungog sa pagsige og singgit pagpangayo og tabang apan bisan paman sa ilang paninguha wala gyud nila kini makuha gikan sa balay.

Apan samtang nagpadayon ang ilang pagbubo og tubig ug nagpaabot sa pag-abot sa mga bombero sa lungsod kalit nga milayat sa bintana si Dimol nga gibanabanang unom ngadto sa pito ka tiil ang gihabugon.

 Ang biktima nakaangkon og mga paso sa ulo ug kalawasan ug dali nilang gidala ni Caballero kauban ang iyang asawa ngadto sa Vicente Sotto Memorial Medical Center apan namatay kini diha palang pag-abot sa barangay Tabunok, Talisay maong ila nalang kining gibalik ngadto sa Aloguinsan.

Mibutyag ang mga sakop sa Aloguinsan Fire Station nga dugay gyud nila narespondehan ang sunog tungod sa distansyang pito ngadto sa walo ka kilometros gikan sa Poblacion.

Gibanabanang mokabat sa P50 mil ang danyos sa maong sunog. – BANAT NEWS