Nagbiseklita gitapsingan misaliring

CEBU, Philippines - Nabulit sa mga samad ug bun-og ang lawas sa usa ka tawo dihang misaliring kini ug nabagnos pag-ayo sa karsada human patapsingi sa usa ka hit and run nga sakyanan ang gisakyan niyang bisikleta didto sa south coastal road habig sa sitio San Rafael, barangay Tanke, dakbayan sa Talisay kagahapon sa buntag.

Ang biktima mao si Romnick Monterola Oficiar, hingkod, nga taga sitio Kalinaw, Tanke kinsa gikan sa ulo ug ubang bahin sa lawas nahiagom sa mga samad ug bun-og.

Si PO3 Amelito Hornales sa Talisay City Traffic Division mibutyag sa Banat News nga ang biktima nagsakay sa iyang biseklita dihang pag-abot sa maong lugar may nagbadyong nga sakyanan ug gipatapsingan ang iyang biseklitang nagdagan, hinungdan nga nalagpot siya ug sa pagtugpa niya sa sementadong karsada misaliring siya maoy hinungdan nga wala niya maklaro ang matang sa sakyanang misangkil kaniya kay wala man kini mohunong.

Gidali siya paghatod ngadto sa Talisay City District Hospital samtang padayon pang gipanid-an karon sa kapolisan ang hit and run nga sakyanan. – BANAT NEWS