Taga Badian nasagmuyo

CEBU, Philippines - Ang mga senior citizens(SC) sa Badian mipadayag og kasagmuyo sa kapakyas sa Kapitolyo sa paghatag sa hustong serbisyo sa maayong panglawas sa ilang lungsod.

Kini nasayran atol sa usa ka tigum nga gitambongan sa kaping 300 ka tawo sa lungsod sa Badian.

Didto sila nagtagbo sa barangay Banhigan diin may usa ka konsehal kinsa wala magpaila nga misumbong bahin sa hilabihan niyang kahiubos kay wala dawata sa Vicente Sotto Memorial Medical Center ang iyang health card.

Matud pa sa maong konsehal nga kolorom diay ang health card nga gipanghatag sa Kapitolyo kanila.

Gawas niana, may mga SC nga wala makadawat sa tag P500 nga cash assistance gikan sa Kapitolyo.

Maoy hinungdan nga gihangop sa taga Badian ang pagbisita nila ni Liberal Party gubernatorial candidate Hilario “Junjun” Davide III ug ni bise Gobernador Gregorio Sanchez tungod kay matud nila mao kini paagi nga makatagamtam usab sila og benepisyo sama sa mga SC sa dakbayan sa Sugbo nga balor og P4,000. – BANAT NEWS